نئی نویلی بیوی دیپیکا کو کیسے خوش رکھتے ہیں، رنویر نے کیا انکشاف

حال ہی میں اداکارہ دیپیکا پادوکون سے شادی کرنے والے اداکار رنویر سنگھ نے اس راز کا انکشاف کر دیا ہے کہ وہ آخر کس طرح سے اپنی نئی نویلی بیوی کو خوش رکھتے ہیں۔ رنویر سنگھ نے خوش حال زندگی کا راز بتاتے ہوئے کہا، ’’بیوی جو بھی کہے اس پر صرف ہاں کہیں۔‘‘

ممبئی میں یکم دسمبر کی رات منعقدہ شادی کے ریسیپشن میں دیپیکا پادوکون کو دیکھتے ہوئے یہ بات کہی، اس دوران سپر اسٹار امیتابھ بچن سے لے کر کرکٹ اسٹار مہیندر سنگھ دھونی جیسی ہستیاں موجود تھیں۔

رنویر اور دیپیکا نے ممبئی میں ہفتہ کو دی گرینڈ حیات میں شادی کا ریسیپشن منعقد کیا۔ تقریب کے دوران امیتابھ بچن نے اپنے گیت ’جما چما‘ پر ڈانس کیا اور سپر اسٹار شاہ رخ خان، ملائکا اروڑا کے ساتھ ’چھئیاں چھئیاں ‘ گانے پر تھرکے۔

تقریب میں نہ صرف امیتابھ بچن بلکہ کرشما کپور اور ورون دھون نے بھی جڑواں کے گیت پر ڈانس کیا۔ اداکارہ شلپا شیٹی کے شوہر راج کندرا نے ایک ویڈیو اپلوڈ کی ہے جس میں وہ رنویر کے ساتھ بات کرتے نظر آ رہے ہیں۔

واضح رہے رنویر دیپیکا نے 14-15 نومبر کو اٹلی کے لیک کومو میں سندھی اور کونکنی رسم و رواج سے شادی کی تھی۔ ان کی شادی کافی نجی رکھی گئی تھی اور شادی میں دونوں خاندانوں کے علاوہ بے حد قریبی لوگوں کو مدعو کیا گیا تھا۔

رنویر اور دیپیکا کے فینز کے ساتھ ان کے خاندان والوں کو بھی کافی وقت سے ان کی شادی کا انتظار تھا۔ بتایا جاتا ہے کہ رنویر اور دیپیکا 6 سال سے رابطہ میں تھے اور 21 اکتوبر کو انہوں نے ایک سوشل میڈیا پوسٹ کے ذریعہ اپنی شادی کی تاریخ کا اعلان کیا تھا۔