ملک بھر میں اومیکرون کا تیزی سے پھیلاؤ، متاثرین کی تعداد 422 سے تجاوز، دہلی-مہاراشٹر سر فہرست

مرکزی وزارت صحت کے تازہ ترین اعداد و شمار کے مطابق ملک میں گزشتہ 24 گھنٹوں کے دوران کورونا وائرس کے 6987 معاملوں کی تصدیق کی گئی، جبکہ 162 لوگوں کی جان چلی گئی

کورونا جانچ کے لیے سیمپل
کورونا جانچ کے لیے سیمپل
user

قومی آوازبیورو

نئی دہلی: ہندوستان میں کورونا وائرس کے اومیکرون ویرینٹ کے کیسز میں لگاتار اضافہ درج کیا جا رہا ہے۔ مرکزی وزارت صحت کے اعداد و شمار کے مطابق ملک میں اومیکرون کے معاملوں کی مجموعی تعداد 422 ہو گئی ہے۔ مہاراشٹر اور دہلی میں اومیکرون کے سب سے زیادہ بالترتیب 108 اور 79 معاملوں کی تصدیق کی گئی ہے۔ دریں اثنا، اومیکرون کے 422 مریضوں میں سے 130 مریض شفایابی حاصل کر چکے ہیں۔

ادھر، ملک میں کورونا وائرس کے کیسز میں بھی اضافہ ہو رہا ہے۔ مرکزی وزارت صحت کی جانب سے اتوار کے روز جاری کئے گئے اعداد و شمار کے مطابق ملک بھر میں گزشتہ 24 گھنٹوں کے دوران کورونا کے 6987 نئے معاملوں کی تصدیق کی گئی۔ اس دوران 7091 مریضوں نے شفایابی حاصل کر لی جبکہ 162 افراد کی جان چلی گئی۔


اومیکرون کے خدشات کے پس منظر میں وزیر اعظم نریندر مودی نے گزشتہ روز قوم سے اپنے خصوصی خطاب میں تین بڑے اعلانات کیے۔ انہوں نے بتایا کہ اب 15 سے 18 سال کے بچوں کو کورونا کی ضروری ویکسین لگائی جا رہی ہے۔ اس کے ساتھ ہی انہوں نے فرنٹ لائن ورکرز، ہیلتھ ورکرز اور 60 سال سے زیادہ عمر کے شدید بیمار لوگوں کو بوسٹر ڈوز دینے کا بھی اعلان کیا۔

قومی آواز اب ٹیلی گرام پر بھی دستیاب ہے۔ ہمارے چینل (qaumiawaz@) کو جوائن کرنے کے لئے یہاں کلک کریں اور تازہ ترین خبروں سے اپ ڈیٹ رہیں۔