رام لیلا میدان کا نام بدل کر واجپئی کے نام پر رکھنے کی تیاری

سابق وزیر اعظم اٹل بہاری واجپئی کی موت کا بی جے پی کے ذریعہ سیاسی استعمال جس شدت کے ساتھ کیا جا رہا ہے اس سے کئی طبقات میں ناراضگی ہے ۔ جس انداز سے بی جے پی کی ہر ریاست میں ان کی موت کو لے کر تشہیر کی جارہی ہے اور آگے کا جو پروگرام بنایا جا رہا ہے اس سے صاف ظاہر ہے کہ آئندہ عام انتخابات تک بی جے پی سابق وزیر اعظم کی موت کو سیاسی طور پر بُھنانے میں مصروف ہے۔ اب خبر ہے کہ دہلی کے تاریخی رام لیلا میدان کا نام واجپئی کے نام پر تبدیل کرنے کی تیاری میں ہے اور اس پر ساؤتھ دہلی میونسپل کارپوریشن غور کر ے گی ۔ کونسلروں نے اس تعلق سے ایک قرارداد پیش کی ہے جس پر 30 اگست کو غور کیا جائے گا۔

واضح رہے رام لیلا میدان ایک تاریخی حیثیت رکھتا ہے اور یہ ملک کی کئی بڑی تحریکوں کا گواہ بھی رہا ہے۔ اب اس کے نام کو بدلنے کی جو بات ہو رہی ہے اس کے پیچھے بھی سیاست کے علاوہ کچھ نظر نہیں آرہاہے ۔ ویسے دہلی میں کسی بھی جگہ کا نام بدلنے کے لئے قرارداد کو کارپوریشن کی نیمنگ کمیٹی کے پاس بھیجا جاتا ہے جہاں غور کرنے کے بعد اس قرارداد پر فیصلہ لیا جاتا ہے ۔

بی جے پی کی سب سے بری پریشانی یہ ہے کہ اونچی ذات کے ہندو اس سے ناراض ہیں اس لئے اس کی کوشش ہے کہ واجپئی کے نام پر زیادہ سے زیادہ تقریبات کا انعقاد کر کے اس ووٹر کی ناراضگی دور کی جائے ۔چند روز قبل سابق وزیر اعظم اٹل بہاری واجپئی کی بھتیجی رتنا شکلا نے جو الزام لگایا تھا کہ بی جے پی کی مرکزی او رریاستی حکومت کو پہلے ایک دن بھی واجپئی کا خیال نہیں آیا اور اب انتقال کے بعد وہ ان کی موت کا سیاسی استعمال کر رہی ہے ۔ دوسری جانب بی جے پی کی قیادت والی ہر ریاست میں واجپئی کے نام پر تقریبات کی جھڑی لگ گئی ہے۔