پٹرولیم مصنوعات کی قیمتوں میں اضافے پر راجیہ سبھا میں ہنگامہ

نئی دہلی: راجیہ سبھا میں اہم اپوزیشن کانگریس اور دیگر پارٹیوں نے پٹرول اور ڈیزل کی روز بڑھتی قیمتوں کے سلسلے میں منگل کو راجیہ سبھا میں ہنگامہ کیا، جس کے سبب ایوان کی کارروائی 2 بجے تک کے لئے ملتوی کردی گئی۔ صبح 11 بجے وقفہ صفر کی کارروائی شروع ہوتے ہی اپوزیشن پارٹیوں کے ارکان نے ہنگامہ شروع کر دیا۔

ڈپٹی اسپیکر ہری ونش نے کہا کہ اپوزیشن کے لیڈر ملک ارجن کھڑکے، بہوجن سماج پارٹی کے ستیش چندر مشرا، شیو سینا کی پرینکا چترویدی اور ڈی ایم کے کے تروچی شیوا نے پٹرولیم مصنوعات کی قیمتوں پر ضابطہ 267 کے تحت کام ملتوی کرنے کی کا نوٹس پیش کیا ہے۔

ہری ونش نے کہا کہ اسپیکر ایم وینکیا نائیڈو نے کل ہی ضابطہ 267 پر انتظام دیا تھا۔ اسپیکر کی اجازت کے بغیر ضابطہ 267 پر بحث نہیں ہوسکتی۔ اس دوران اپوزیشن پارٹیوں کے ارکان ایوان کے بیچ میں آگئے اور نعرے بازی کرنے لگے۔ تقریباً 20 منٹ کی کارروائی کے بعد ایوان کی کارروائی 2 بجے تک کے لئے ملتوی کردی گئی۔

ہری ونش نے اپوزیشن کے لیڈر سے خاموش ہونے اور ایوان کی کارروائی چلنے دینے کی اپیل کی۔ انہوں نے ایوان سے نعرے بازی نہ کرنے اور اپنی نشستوں پر جانے کی بھی اپیل کی۔ انہوں نے کہا کہ وقفہ صفر کے دوران ارکان اہم امور کو اٹھاتے ہین، اس لئے وہ اپنی اپنی نشستوں پر جائیں۔ اسی دوران تروچی شیوا نے انتظام کا معاملہ اٹھاتے ہوئے کہا کہ پٹرول اور ڈیزل کی قیمتوں میں اضافہ ہو رہا ہے جس کے سبب ارکان ہنگامہ کر رہے ہیں۔

بھارتیہ جنتاپارٹی کے بھوپیندر یادو نے کہا کہ ارکان کا ہنگامہ جائز نہیں ہے۔ وہ ایوان کی کارروائی چلنے دیں۔ انہوں نے کہا کہ اپوزیشن کے لیڈر کو اس معاملے پر کل بولنے کا موقع دیا گیا تھا۔ ہنگامے کے دوران ہی جنتادل (و) کے رام ناتھ ٹاھرک نے اپنا معاملہ اٹھایا۔ ارکان کے خاموش نہ ہونے پر ڈپٹی اسپیکر نے ایوان کی کارروائی 2 بجے تک ملتوی کردی۔