راجستھان کے تاجر نے چاند کے علاقے میں خریدی زمین، شہریت بھی حاصل!

راجستھان کے جھنجھنو ضلع کے ایک غیر مقیم ہندوستانی تاجر نے چاند پر 14 ایکڑ زمین خریدی ہے۔ اس تاجر کا کہنا ہے کہ چاند پر زمین خریدنے کے ساتھ اسے چاند کی شہریت بھی حاصل ہو گئی ہے۔ تاجر نے بتایا کہ اسے زمین کے کاغذات کے ساتھ بہت سے حقوق بھی دیے گئے ہیں۔ انہوں نے بتایا کہ چاند کی شہریت انہیں ’لونا سوسائٹی‘ کی جانب سے فراہم کی گئی ہے۔

ہوٹل کاروباری ابھیلاش جانگڈ نے بتایا کہ جب وہ فلوریڈا میں تھے تو اس وقت لونا سوسائٹی نے چاند پر زمین بیچنے کا اعلان کیا تھا۔ اس اعلان کے بعد ان کا چاند پر زمین خریدنے کا تجسس مزید بڑھ گیا، اس کے لیے ہم نے آن لائن درخواست دی اور وہاں زمین خریدی۔ سوسائٹی نے جائیداد کے کاغذات کے علاوہ بورڈنگ پاس اور ٹکٹ بھی فراہم کیے ہیں۔

ابھیلاش نے بتایا کہ اگر انہیں مستقبل میں وہاں جانے کا موقع ملا تو وہ ضرور جائیں گے، کیونکہ بہت کم لوگ چاند پر گئے ہیں۔ انہوں نے بتایا کہ لونا سوسائٹی کی چاند پر الگ الگ مقامات پر اراضی ہے۔ جس میں سے انہوں نے ’سی آف ماسکوس‘ اور ’لینڈ آف ہیپینس‘ دو مقامات پر تقریباً 14 ایکڑ زمین خریدی ہے۔ وہاں زمین خریدنے کے ساتھ ہی انہیں چاند کی شہریت بھی مل گئی۔

انٹرنیٹ پر ایسی کئی ویب سائٹس ہیں جو چاند پر زمین خریدنے کا دعویٰ کرتی ہیں۔ یہ ویب سائٹس آپ کو چاند پر زمین خریدنے کی پیشکش کرتی ہیں اور جب آپ ادائیگی کرتے ہیں تو آپ کو کاغذ بھی مل جاتے ہے۔ ان دنوں بہت سے لوگ ان ویب سائٹس کا سہارا لے کر چاند پر زمین کا تحفہ دے رہے ہیں۔ اس خریداری میں سیٹلائٹ کے ذریعے لی گئی تصویر بھی دی گئی ہے، تاکہ خریدار کو چاند پر زمین خریدنے کا مکمل احساس ہو۔ چاند پر زمین کی کاغذی خریداری الگ بات ہے لیکن وہان جانا اور قیام کرنا ابھی دور کی کوڑی ہے۔