دہلی این سی آر میں سرد موسم کے درمیان بارش سے معمولات زندگی متاثر، کئی علاقوں میں پانی کا بھراؤ

دہلی اور این سی آر کے نوئیڈا، گریٹر نوئیڈا اور غازی آباد میں گزشتہ شب سے بارش کا سلسلہ جاری ہے، جس کے سبب گاڑیوں کی نقل و حمل متاثر ہوگئی۔

تصویر آئی اے این ایس
تصویر آئی اے این ایس
user

قومی آوازبیورو

نئی دہلی: سرد موسم کے درمیان دہلی این سی آر میں گزشتہ شب سے لگاتار ہو رہی بارش کی وجہ سے کئی علاقوں میں پانی بھرنے کی اطلاعات موصول ہوئی ہیں۔ رات دیر گئے شروع ہونے والی بارش دن بھر جاری رہی، جس کی وجہ سے دہلی کے منڈاولی انڈر پاس پر پانی جمع ہوگیا ہے اور وہاں سے گزرنے والوں کو بھاری پریشانی کا سامنا کرنا پڑا۔ اس کے علاوہ دہلی کے پرہلاد پور علاقے میں بھی پانی بھراؤ کی صورتحال نظر آئی ہے۔

ہندوستانی محکمہ موسمیات نے پیش گوئی کی ہے کہ اگلے 24 گھنٹوں تک پنجاب، ہریانہ، دہلی اور راجستھان میں بارش کا سلسلہ جاری رہ سکتا ہے۔ بعض علاقوں میں ہلکی سے تیز بارش ہونے کا امکان ہے۔ اس کا اثر پوری دہلی اور این سی آر (گروگرام، فرید آباد، مانیسر، بلبھ گڑھ، کرنال، پانی پت، جھجر، فرخ نگر، کوسلی، ریواڑی، باول، نوح (ہریانہ)، شاملی، کاندھلہ، بڑوت، باغپت (یوپی)، بھیواڑی (راجستھان) میں ہوگا۔


خبر تحریر کئے جانے تک دہلی این سی آر میں بارش کا سلسلہ لگاتار جاری تھا۔ نوئیڈا، گریٹر نوئیڈا اور غازی آباد میں رات سے وقفے وقفے سے بارش ہو رہی ہے۔ جس کے باعث ٹریفک میں بھی خلل پڑ رہا ہے اور گاڑیوں کی رفتار ماند پڑگئی ہے۔

قومی آواز اب ٹیلی گرام پر بھی دستیاب ہے۔ ہمارے چینل (qaumiawaz@) کو جوائن کرنے کے لئے یہاں کلک کریں اور تازہ ترین خبروں سے اپ ڈیٹ رہیں۔