ریلوے بھرتی بورڈ: کیوں عوامی مدوں پر عام آدمی پارٹی عوام کے ساتھ نہیں کھڑی ہوتی؟

ریلوے بھرتی بورڈ کے خلاف طلباء سڑکوں اور ریل کی پٹریوں پر نظرآئے ۔ عام آدمی پارٹی جو دعویٰ کرتی ہے کہ وہ عوام کے مدوں کے لئے لڑتی ہے پھر وہ ایسے مدوں پر خاموش کیوں رہتی ہے؟

بہار کے گیا میں آر آر بی امتحان کے خلاف مظاہرہ کرتے طلبا / آئی اے این ایس
بہار کے گیا میں آر آر بی امتحان کے خلاف مظاہرہ کرتے طلبا / آئی اے این ایس
user

قومی آوازبیورو

نئی دہلی: ریلوے بھرتی بورڈ غیر تکنیکی مقبول کیٹیگری (نان ٹیکنیکل پاپولر کیٹیگری) کے نتائج کے خلاف جس طرح طلباء سڑکوں پر اترے اور احتجاج کیا، اس پر کئی سیاسی پارٹیوں نے اپنا موقف پیش کیا۔ کئی مقامات پر احتجاج پر تشدد ہو گئے اور بہار سے شروع ہونے والے اس احتجاج کی لپٹیں اتر پردیش میں بھی محسوس ہونے لگیں، جس کی وجہ سے پریاگ راج میں چھ پولیس اہلکار طلباء کے خلاف مبینہ کارروائی کی وجہ سے معطل بھی ہو گئے۔

کانگریس کی جنرل سیکریٹری پرینکا گاندھی نے پریاگ راج کے طلباء سے بات کی اور اپنی حمایت کا اظہار کیا۔ اب اس معاملہ میں عام آدمی پارٹی کی خاموشی پر سوال اٹھائے جا رہے ہیں کیونکہ اس پارٹی کی پیدائش ہی تحریک سے ہوئی ہے، طلباء کی تحریک پر اس کی خاموشی حیرانی کا باعث ہے۔


عام آدمی پارٹی کے تعلق سے اب یہ کہا جانے لگا ہے کہ ان کی ترجیح صرف اور صرف اقتدار ہے۔ سابق مرکزی وزیر اجے ماکن تو کئی مرتبہ کہہ چکے ہیں کہ عام آدمی پارٹی بنیادی طور پر بی جے پی کی ’بی ٹیم‘ ہے اور اس کا کام صرف سیکولر پارٹیوں کو نقصان پہنچانا اور بی جے پی کو فائدہ پہنچانا ہے۔

واضح رہے یہ پہلی مرتبہ نہیں ہے جب عام آدمی پارٹی طلباء کے معاملہ پر خاموش ہے، اس سے پہلے بھی جب دہلی کی ’جامعہ ملیہ اسلامیہ‘ یونیورسٹی میں طلباء کے خلاف پولیس کی مبینہ کارروائی ہوئی تھی، جب بھی وہ خاموش رہی تھی اور سی اے ای و این آر سی کے خلاف احتجاج کے دوران بھی خاموش رہی تھی۔ عام آدمی پارٹی پر یہ بھی الزام ہے کہ اس نے دہلی کے فرقہ وارانہ فسادات پر بھی پراسرار خاموشی بنائے رکھی تھی۔ دہلی کے وزیر اعلی اروند کیجریوال کو طلباء کے اس احتجاج پر اپنا موقف واضح کرنا چاہئے۔

Follow us: Facebook, Twitter, Google News

قومی آواز اب ٹیلی گرام پر بھی دستیاب ہے۔ ہمارے چینل (qaumiawaz@) کو جوائن کرنے کے لئے یہاں کلک کریں اور تازہ ترین خبروں سے اپ ڈیٹ رہیں۔