سونیا گاندھی کی خودنوشت پر راہل، پرینکا کا جذباتی پیغام، کہا- ’پاپا اپنی خوبصورت سونیا کو فخر سے دیکھ رہے ہوں گے‘

نئی دہلی: کانگریس رہنما راہل گاندھی اور پرینکا گاندھی نے اپنے والد اور سابق وزیر اعظم راجیو گاندھی کے 82ویں یوم پیدائش کے موقع پر اپنی والدہ سونیا گاندھی کی آنے والی خودنوشت ’بیلانگنگ: اے جرنی آف لو‘ کے حوالے سے جذباتی پیغامات شیئر کیے ہیں۔ دونوں نے سونیا گاندھی کی زندگی، ان کی جدوجہد اور راجیو گاندھی کے ساتھ ان کے رشتے کو یاد کرتے ہوئے کتاب کو سراہا۔

راہل گاندھی نے سوشل میڈیا پلیٹ فارم ایکس پر سونیا گاندھی کے جوانی کے دور کی تصویر کے ساتھ کتاب کا سرورق شیئر کیا۔ انہوں نے اپنی والدہ سے مخاطب ہوتے ہوئے لکھا کہ انہوں نے سونیا اور راجیو گاندھی کو آخری بار 35 سال سے زیادہ عرصہ قبل ایک ساتھ دیکھا تھا۔ راجیو گاندھی کے انتقال کے بعد سے انہوں نے اپنی والدہ کو زندگی کی جانب سے درپیش ہر مشکل کا سامنا مسلسل ہمت اور وقار کے ساتھ کرتے دیکھا ہے۔

راہل گاندھی نے لکھا کہ صرف وہ اور پرینکا ہی جانتے ہیں کہ ان کی والدہ نے کن حالات کا سامنا کیا اور راجیو گاندھی کے بعد ان کی زندگی کتنی مشکل رہی۔ انہوں نے کہا کہ انہیں خوشی اور فخر ہے کہ سونیا گاندھی کی کہانی اب ان لاکھوں لوگوں تک پہنچے گی جو ان سے محبت کرتے ہیں۔

راہل نے مزید کہا کہ وہ جانتے ہیں کہ سونیا گاندھی جیسی نجی زندگی پسند کرنے والی شخصیت کے لیے اپنی خوبصورت کہانی دنیا کے سامنے بیان کرنا کتنا مشکل رہا ہوگا۔ انہوں نے جذباتی انداز میں لکھا، ”آج، ان کی سالگرہ پر، میں پاپا کو مسکراتے ہوئے اور اپنی خوبصورت سونیا کو فخر سے دیکھتے ہوئے دیکھ سکتا ہوں۔“

دوسری جانب پرینکا گاندھی نے بھی سونیا گاندھی کی خودنوشت کا ذکر کرتے ہوئے کہا کہ راجیو گاندھی اپنی سالگرہ کے موقع پر اپنی اہلیہ کو اتنے دل اور ایمانداری کے ساتھ اپنی کہانی لکھنے پر خاص طور پر فخر محسوس کرتے۔ پرینکا نے راجیو اور سونیا گاندھی کے رشتے کو ’’ہمارے عہد کی عظیم ترین محبت کی کہانیوں میں سے ایک‘‘ قرار دیا۔ انہوں نے کہا کہ انہیں اس رشتے کو قریب سے دیکھنے کا اعزاز حاصل رہا ہے اور انہیں خوشی ہے کہ کتاب کے ذریعے لوگ ان کی والدہ کو حقیقت میں جان سکیں گے۔

انہوں نے سونیا گاندھی کو ایک بہادر، وفادار اور ہمدرد خاتون قرار دیتے ہوئے کہا کہ وہ انتہائی مضبوط بھی ہیں اور جب چاہیں تو بہت خوش مزاج اور مزاحیہ بھی۔ پرینکا نے کہا کہ سونیا گاندھی کی زندگی اپنے شوہر اور اپنے ملک سے ان کی محبت کی گواہی ہے۔ انہوں نے آخر میں اپنی والدہ سے مخاطب ہوکر لکھا، ”لو یو، ماں، اور مجھے آپ پر بہت، بہت فخر ہے۔“

خیال رہے کہ سونیا گاندھی کی 544 صفحات پر مشتمل خودنوشت ’بیلانگنگ: اے جرنی آف لو‘ 10 نومبر 2026 کو ہارڈ کور ایڈیشن میں شائع ہوگی۔ امریکی پبلشر الفریڈ اے نوف کے مطابق کتاب کا آڈیو ایڈیشن بھی پینگوئن رینڈم ہاؤس کی جانب سے جاری کیا جائے گا۔ کتاب میں سونیا گاندھی کے جنگ کے بعد کے اٹلی میں بچپن، کیمبرج میں 19 سال کی عمر میں راجیو گاندھی سے ملاقات اور محبت، ہندوستان آمد، خاندانی زندگی اور ان سانحات کا ذکر ہے جنہوں نے ان کی زندگی کا رخ بدل دیا۔

خودنوشت میں سونیا گاندھی کی راجیو گاندھی کی والدہ اور ہندوستان کی پہلی خاتون وزیر اعظم اندرا گاندھی سے ملاقات، سیاست میں ان کی ہچکچاہٹ کے باوجود قدم رکھنے اور بعد میں انڈین نیشنل کانگریس کی طویل عرصے تک صدر رہنے کے سفر کو بھی بیان کیا گیا ہے۔