امریکہ سے معاہدہ کسانوں کی بنیاد پر حملہ، میڈیا خاموش: راہل گاندھی

کیرالہ کے ضلع کنور کے پیراوور میں کسان سنگمم یعنی کسان کنونشن سے خطاب کرتے ہوئے قائد حزب اختلاف راہل گاندھی نے کہا کہ وزیر اعظم نریندر مودی نے امریکہ کے ساتھ ایسا معاہدہ کیا ہے جو ملک کی اصل بنیاد، یعنی کسانوں پر حملہ ہے مگر اس معاملے پر میڈیا خاموش ہے۔

انہوں نے کہا کہ ہندوستانی کسان چھوٹے رقبوں پر کم مشینی وسائل کے ساتھ کاشتکاری کرتے ہیں، جب کہ امریکہ میں کسان وسیع اور انتہائی مشینی کھیتوں پر کام کرتے ہیں۔ ایسے میں اگر امریکی کسانوں کو ہندوستانی زرعی منڈی تک رسائی دے دی گئی تو یہاں کے کسان اس غیر مساوی مقابلے کا سامنا نہیں کر پائیں گے اور وہ بنیاد متاثر ہوگی جسے بڑی محنت سے کھڑا کیا گیا ہے۔

راہل گاندھی نے کہا کہ یہ محض ایک تجارتی فیصلہ نہیں بلکہ کروڑوں کسان خاندانوں کے مستقبل کا معاملہ ہے۔ ان کے مطابق حکومت کو یہ سوچنا چاہیے کہ چھوٹے اور متوسط کسان پہلے ہی بڑھتے اخراجات، موسمی بے یقینی اور منڈی کی مشکلات سے دوچار ہیں، ایسے میں بیرونی مسابقت ان کے لیے مزید دباؤ کا باعث بن سکتی ہے۔

اپنے خطاب میں انہوں نے مزید کہا کہ جب بھی وہ ملک کے مختلف حصوں میں کسانوں سے ملتے ہیں تو تقریباً ایک جیسے مسائل سننے کو ملتے ہیں۔ کسان انسان اور جنگلی جانوروں کے درمیان بڑھتے تنازع سے پریشان ہیں، مناسب ذخیرہ اور کولڈ اسٹوریج کی سہولیات کا فقدان ہے، اور فصلوں کی مناسب قیمت بھی نہیں ملتی۔ ان کے مطابق ان بنیادی مسائل کو حل کرنے کے بجائے ایسے معاہدے کیے جا رہے ہیں جو کسانوں کے لیے نئے چیلنج کھڑے کر سکتے ہیں۔

راہل گاندھی نے کہا کہ کوئی بھی عمارت مضبوط بنیاد کے بغیر قائم نہیں رہ سکتی۔ اسی طرح کوئی ملک بھی اپنی زرعی بنیاد کو کمزور کر کے ترقی نہیں کر سکتا۔ ان کے مطابق کسان اور زراعت ہندوستان کی معیشت اور سماجی ڈھانچے کی بنیاد ہیں، مگر انہیں نہ وہ احترام مل رہا ہے جس کے وہ حق دار ہیں اور نہ ہی مطلوبہ تحفظ فراہم کیا جا رہا ہے۔

انہوں نے زور دے کر کہا کہ اگر کسان کمزور ہوں گے تو ملک کی مجموعی ترقی بھی متاثر ہوگی۔ اس لیے پالیسی سازی میں کسانوں کے مفادات کو اولین ترجیح دی جانی چاہیے اور کسی بھی بین الاقوامی معاہدے سے قبل اس کے طویل مدتی اثرات کا سنجیدگی سے جائزہ لیا جانا ضروری ہے۔

اس سے قبل راہل گاندھی کنور ہوائی اڈے پر پہنچے جہاں پارٹی رہنماؤں اور کارکنوں نے ان کا استقبال کیا۔ دورے کے دوران وہ پیراوور میں کسان کنونشن میں شرکت کے بعد کلپٹہ میں منڈکئی–چورالملا کے متاثرین کے لیے مکانات کی تعمیر کے سنگ بنیاد کی تقریب میں بھی شریک ہوں گے۔