بابر پور کانگریس کمیٹی کے ایگزیکٹیو صدر اور کبیر نگر کے کونسلر حاجی ظریف کی قیادت میں احتجاجی مظاہرہ

نئی دہلی: دہلی پردیش کانگریس کمیٹی کے صدر دیویندر یادو کی اپیل پر آج ضلع بابر پور کانگریس کمیٹی کے ایگزیکٹیو صدر اور کبیر نگر کے کونسلر حاجی ظریف کی قیادت میں سینکڑوں کارکنان نے بابر پور گیس ایجنسی پر زبردست احتجاجی مظاہرہ کیا۔ اس موقع پر ملک اور ریاست میں گیس سلنڈر کی قلت اور بڑے پیمانے پر جاری کالابازاری کے خلاف مرکز کی بی جے پی حکومت کے خلاف سخت نعرے بازی کی گئی۔ مظاہرین نے ’گیس کی سپلائی جاری کرو‘، ’کالابازاری بند کرو‘ اور ’گیس کی قیمتیں کم کرو‘ جیسے مطالبات پر مبنی نعرے لگائے۔

احتجاجی مظاہرے سے خطاب کرتے ہوئے حاجی ظریف نے کہا کہ ایک طرف عوام مہنگائی سے پریشان ہے اور دوسری طرف گیس کی قلت نے عام آدمی کا جینا محال کر دیا ہے۔ انہوں نے خاص طور پر رمضان المبارک کے مقدس مہینے کا حوالہ دیتے ہوئے کہا کہ روزے داروں کو ایک سلنڈر کے لیے دن بھر طویل قطاروں میں کھڑا ہونا پڑ رہا ہے، جو انتہائی افسوسناک ہے۔ انہوں نے مرکزی حکومت سے مطالبہ کیا کہ گیس کی بلاتعطل فراہمی کو یقینی بنایا جائے اور کالابازاری پر فوری لگام لگائی جائے۔

اس احتجاجی مظاہرے میں بلاک صدر محمد شباب، حاجی نصیب عالم، حاجی سعید، حاجی اشرف، گلفام چودھری، کلام چودھری، اقرار، اچھن خان، ڈاکٹر رحمان، آصف، عارف اور حافظ دلشاد سمیت سینکڑوں کی تعداد میں کانگریس کارکنان اور عوام موجود تھے۔