امریکی بربریت کے خلاف ممبئی میں احتجاج

ممبئی کی مختلف تنظیموں کی جانب سے عراق میں جاری امریکی فوجی بربریت کے خلاف زبردست احتجاج کیا گیا اور شہر میں واقع امریکی قونصل خانہ کو ایک مذمتی خط روانہ کیا گیا اور مطالبہ کیا گیا کہ امریکہ آئندہ دہشت گردانہ کارروائیوں سے باز رہے۔ ممبئی کے مضافات باندرا کے امبیڈکر گارڈن سے مردوخواتین پر مشتمل سیکڑوں افراد احتجاجی مظاہرہ کرتے ہوئے جوں ہی ایسٹرن ایکسپریس ہائی وے پر پہنچے تو پولیس کی ایک بھاری جمیعت نے انہیں امریکی قونصل خانہ کی جانب رخ کرنے سے روک دیا۔

مجتعہ، علماء و خطباء، مسلم ایسوسی ایشن فور پیس اینڈ ہارمنی ، مسجد ایرانیان ٹرسٹ ،اثناء عثری یوتھ فاونڈیشن اور دیگر کی جانب سے منعقدہ اس احتجاجی مظاہرہ سے خطاب کرتے ہوئے نامور شیعہ عالم دین حسنین کراروی صاحب نے کہا کہ امریکہ دنیا کی ایک طاقتور اور احترام والی قوم ہے لہذا اس طاقت اور احترام کے ساتھ ہمدردی اور ذمہ داری بھی اس پر عائد ہوتی ہے جبکہ امریکہ نے ایک شہید جنرل قاسم سلیمانی کو ایک دہشت گرد اور اسلامی جمہوریہ ایران کو بھی دہشت گرد ملک گردانا ہے ، امریکہ کے یہ الزامات نہ صرف ایرانی قوم کی توہین ہے بلکہ عام طور پر انسانیت کی بھی توہین ہے ۔

انہو ںنے کہا کہ ایرانی جنرل شہید قاسم سلیمانی اور عراقی کمانڈر ابو مہدی ال مہدیس انتہائی قابل قدر اقدامات کر کے دہشت گردی کے خاتمہ کے لئے داعش ، القائدہ اور متعدد مزید دہشت گرد تنظیموں کا مقابلہ کیا تھا نیز ایسے عظیم انسانوں کا قتل اور انہیں دہشت گرد قرار دینے کی کوشش انسانیت کے خلاف ایک جرم ہے ۔

مجتبہ علما ٔ و خطبا ٔ کے صدر مولانا فیاض باقر نے ایرانی جنرل شہید قاسم سلیمانی اور عراقی کمانڈر ابو مہدی ال مہدیس کا امریکی فوجیوں کے ہاتھوں قتل اور انہیں دہشت گرد قرار دینے کی کوشش نہ صرف ناقابل برداشت ہے بلکہ یہ امریکی جارحیت کا کھلا ثبوت ہے ۔
انہوں نے مزید کہا کہ ہندوستان کے مسلمان ان دونوں فوجی افسران کی شہادت کو سلام کرتے ہیں اور امریکی حکومت سے مطالبہ کرتے ہیں کہ وہ دہشت گردانہ کارروائیاں فوری طور پر بند کرے ۔

امام جمعہ امامیہ مسجد مولانا غلام عسکری نے کہا کہ جنرل سلیمانی کو گھات لگا کر موت کی آغوش میں پہنچانا امریکہ اور اس کے صدر کی انتہائی درجہ کی بزدلی ہے نیز جو شیر ہوتے ہیں وہ شیروں کی طرح لڑتے ہیں گھات لگا کر دھوکہ سے نہیں مارتے ہیں ۔

اس موقع پر مسلم ایسوسی ایشن فور پیس اینڈ ہارمنی کے صدر محمد عباس خان نے کہا کہ امریکہ دنیا کے تمام دہشت گردوں کا سردار ہے اور فتنوں کا ذمہ دار ہے ایرانی جنرل شہید قاسم سلیمانی امریکہ ، اسرائیل کے تمام فتنہ گر حربوں کا مکمل جواب تھے ۔ قاسم سلیمانی نے دنیا کو امریکی ، اسرائیلی دہشت گرد تنظیم آئی ایس آئی ایس کے شدید خطرے سے محفوظ کیا ہے جس کیلئے دنیا انہیں ہمیشہ یاد کرے گی اور ان کی دھوکہ سے کی گئی شہادت کیلئے امریکہ کو کبھی معاف نہیں کرے گی ۔