پرینکا گاندھی کی کیمرا مین کو مندر کا لحاظ رکھنے کی ہدایت، مودی پر کھڑے ہوئے سوال

پرینکا گاندھی کی اس ویڈیو کو جس قدر پسند کیا جا رہا ہے اس سے ایک بات تو صاف ہے کہ عوام کو غیر ضروری تشہیر اور خاص طور سے مذہبی مقامات کی تصاویر شیئر کرنا پسند نہیں ہے۔

تصویر سوشل میڈیا
تصویر سوشل میڈیا
user

قومی آوازبیورو

وزیراعظم نریندر مودی نے گزشتہ پانچ سالوں میں ملک کو کچھ دیا ہو یا نہ دیا ہو لیکن سیاسی رہنماؤں کو ایک چیز ضرور سکھا دی ہے کہ اپنی اور اپنے عہدے کی مارکیٹنگ کیسے کی جانی چاہیے۔ وزیراعظم نریندر مودی نے ا پنی مارکیٹنگ کا کوئی بھی موقع ہاتھ سے کبھی جانے نہیں دیا۔ ان کی ہمیشہ کوشش رہی کہ ان کی تصاویر ہر موقع کی ہوں اور ہر اینگل سے ہوں۔ کبھی اگر کوئی ان کے اور کیمرے کے بیچ میں آ گیا تو انہوں نے یہ یقینی بنایا کہ کہ وہ شخص آئندہ ایسی غلطی نہ دہرائے، چاہے وہ ان کے حفاظتی دستے کا اہلکار ہو یا کوئی بڑی کمپنی کا سی ای او۔ اس بات کا پورے ملک کو علم ہے کہ نریندر مودی ان معاملوں میں کتنے حساس ہیں۔


پلوامہ میں سی آر پی ایف قافلہ پر دہشت گردانہ حملہ کے وقت بھی وزیر اعظم جم کاربیٹ میں ایک فلم کے لئے شوٹنگ کر رہے تھے اور اتنے بڑے حادثہ کے باوجود شوٹنگ چلتی رہی۔ فلم اداکار اور کناڈا کے شہری اکشے کمار کو انٹرویو دینے کے معاملہ میں بھی انہوں نے اس بات کا لحاظ نہیں رکھا کہ وہ وزیراعظم ہیں اور ان کو اس طرح کی چیزوں سے پرہیز رکھنا چاہیے مگر ان کو مارکیٹنگ کا یہ طریقہ بہترین نظر آیا۔ اس کے بعد جتنے بھی انٹرویو دیئے ہیں انہوں نے مارکیٹنگ کے پہلو کو سب سے اوپر رکھا ہے۔ اس معاملہ میں انہوں نے اپنی مذہبی شخصیت کی تشہیر کو بھی یقینی بنایا ہے۔ انہوں نے اس بات کو بھی یقینی بنایا کہ کسی بھی مندر میں ان کی پوجا کی نشریات سیدھی ہونی چاہیے اور وارانسی میں بھی اس بات کو یقینی بنایا گیا کہ آرتی کیے جانے کے پورے عمل کو سیدھا نشر کیا جائے۔


وزیراعظم نریندر مودی کے برعکس کانگریس کی جنرل سکریٹری پرینکا گاندھی کی ایک ایسی ویڈیو سامنے آئی ہے جس سے صاف ظاہر ہوتا ہے کہ وہ اپنے مذہبی عمل کی تشہیر کے سخت خلاف ہیں، اس کو وہ عقیدت اور ذاتی معاملہ مانتی ہیں۔ واقعہ کچھ ایسا ہے کہ پرینکا گاندھی جب کال بھیرو مندر میں پوجا کرنے کے لئے گئیں تو وہاں کسی کیمرا مین نے ان کی تصویر کھیچنے کی کوشش کی جس پر پرینکا نے کہا ’’مندر کے اندر ہیں تھوڑا تو لحاظ کریئے‘‘۔


واضح رہے وہاں موجود لوگوں نے اپنے موبائل سے ان کی یہ ویڈیو بنا کر سوشل میڈیا پر شیئر کی ہے۔ اس ویڈیو پر لوگوں نے ٹوئٹ کیا ہے کہ وزیر اعظم نریندر مودی نے فوٹو گرافروں کی عادت ایسی ڈال دی ہے کہ وہ مندر کے اندر بھی تصویر کھیچنے سے باز نہیں آتے۔ نریندر مودی نے مندر کے اندر تصویر کھچواتے وقت اس بات کا لحاظ نہیں کیا کہ وہ مندر کے اندر ہیں یا باہر، بس ان کو اپنی مارکیٹنگ کی فکر رہی ہے۔ پرینکا گاندھی کی اس ویڈیو کو جس قدر پسند کیا جا رہا ہے اس سے ایک بات تو صاف ہے کہ عوام کو غیر ضروری تشہیر اور خاص طور سے مذہبی مقامات کی تصاویر شیئر کرنا پسند نہیں ہے۔

Follow us: Facebook, Twitter, Google News

قومی آواز اب ٹیلی گرام پر بھی دستیاب ہے۔ ہمارے چینل (qaumiawaz@) کو جوائن کرنے کے لئے یہاں کلک کریں اور تازہ ترین خبروں سے اپ ڈیٹ رہیں۔


Published: 16 May 2019, 5:10 PM