یوپی میں چھٹے مرحلہ کی پولنگ کے درمیان پرینکا گاندھی کی ووٹروں سے اپیل، ’ریاست کی ترقی کے لئے ووٹ کریں‘

پرینکا گاندھی نے کہا کہ یوپی کے میری پیاری بہنوں اور بھائیو! آپ کے ووٹ سے یوپی کا مستقبل طے ہونا ہے، ریاست کی آنے والی نسل کا مستقبل طے ہونا ہے۔ اس لئے ریاست کی ترقی کے لئے ووٹ کریں۔

پرینکا گاندھی، تصویر ٹوئٹر @INCUttarakhand
پرینکا گاندھی، تصویر ٹوئٹر @INCUttarakhand
user

قومی آوازبیورو

نئی دہلی: کانگریس جنرل سکریٹری پرینکا گاندھی نے اتر پردیش اسمبلی انتخابات کے چھٹے مرحلے کے لیے جاری ووٹنگ کے درمیان روزگار، مہنگائی میں کمی، تعلیم، صحت میں بہتری، کسانوں کی خوشحالی کے مسائل پر ووٹ دینے کی اپیل کی ہے۔

پرینکا گاندھی نے اپنے پیغام میں کہا کہ یوپی کے میری پیاری بہنوں اور بھائیو! آپ کے ووٹ سے یوپی کا مستقبل طے ہونا ہے، ریاست کی آنے والی نسل کا مستقبل طے ہونا ہے۔ اپنے ووٹ کی طاقت کو پہچانیں، روزگار، مہنگائی کم کرنے، تعلیم، صحت کی بہتری، کسانوں کی خوش حالی، خاتون بااختیاری اور ریاست کی ترقی کے لئے ووٹ کریں۔‘‘


پرینکا گاندھی سے پہلے وزیر اعظم نریندر مودی نے بھی تمام ووٹروں سے ووٹ ڈالنے کی اپیل کرتے ہوئے کہا ہے کہ ہر ووٹ جمہوریت کی طاقت ہے اور تمام ووٹروں کو جمہوریت کے اس جشن میں شرکت کرنی چاہیے۔

خیال رہے کہ جمعرات کو اتر پردیش کے 10 اضلاع کی 57 اسمبلی سیٹوں پر ووٹنگ ہو رہی ہے۔ ان سیٹوں پر کل 676 امیدوار قسمت آزمائی کر رہے ہیں۔ ان میں گورکھپور، امبیڈکر نگر، بلیا، بلرام پور، بستی، دیوریا، کشی نگر، مہاراج گنج، سنت کبیر نگر اور سدھارتھ نگر شامل ہیں۔


وزیر اعلی یوگی آدتیہ ناتھ خود گورکھپور سے انتخابی میدان میں ہیں۔ پچھلی بار یعنی 2017 میں ان 57 سیٹوں میں سے 46 بی جے پی اور دو اس کے اتحادیوں اپنا دل اور ایس بی ایس پی نے جیتی تھیں۔ اس وقت ایس بی ایس پی اور بی جے پی کا اتحاد تھا، جبکہ اس بار اس نے سماج وادی پارٹی (ایس پی) سے اتحاد کیا ہے۔

قدآور لیڈران پر نظر ڈالیں تو سوریہ پرتاپ شاہی، جے پرتاپ سنگھ، اوپیندر تیواری، بی جے پی چھوڑ کر ایس پی میں شامل ہوئے سوامی پرساد موریہ، کانگریس کے ریاستی صدر اجے کمار للو، رام گووند چودھری، امن منی ترپاٹھی، ونے شنکر تیواری، شلبھ منی ترپاٹھی سمیت کئی تجربہ کار لیڈروں کی ساکھ داؤ پر لگی ہوئی ہے۔

Follow us: Facebook, Twitter, Google News

قومی آواز اب ٹیلی گرام پر بھی دستیاب ہے۔ ہمارے چینل (qaumiawaz@) کو جوائن کرنے کے لئے یہاں کلک کریں اور تازہ ترین خبروں سے اپ ڈیٹ رہیں۔