یو پی: وائرل بخار سے ہو رہی اموات نے پرینکا کو کیا فکرمند، یوگی حکومت سے پوچھا سوال

کانگریس جنرل سکریٹری پرینکا گاندھی نے جمعہ کے روز اتر پردیش میں وائرل بخار سے ہو رہی اموات پر فکر کا اظہار کیا اور کہا کہ حکومت کو اس سلسلے میں فوری توجہ دینے کی ضرورت ہے۔

پرینکا گاندھی کی فائل تصویر
پرینکا گاندھی کی فائل تصویر
user

قومی آوازبیورو

اتر پردیش میں پراسرار بخار کی وجہ سے اب تک درجنوں افراد کی جان جا چکی ہے اور اس وائرل بخار نے خصوصی طور پر بچوں کو زیادہ نقصان پہنچایا ہے۔ کانگریس جنرل سکریٹری پرینکا گاندھی نے جمعہ کے روز ریاست میں پھیلے اس بخار کو لے کر ایک ٹوئٹ کیا جس میں انھوں نے فکرمندی ظاہر کرتے ہوئے لکھا کہ ’’یو پی میں وائرل بخار سے 100 سے زائد لوگوں کی جان جانے کی خبر پر فوری توجہ دینے کی ضرورت ہے۔ کیا یو پی حکومت نے دوسری لہر میں اپنے تباہ کن کووڈ مینجمنٹ کے بھیانک نتائج سے کوئی سبق نہیں سیکھا ہے؟‘‘

پرینکا گاندھی نے ریاست کی یوگی حکومت سے یہ یقینی بنانے کے لیے کہا کہ متاثرین کو صحت خدمات فراہم کرنے اور بیماری کو پھیلنے سے روکنے کے لیے ضروری احتیاط کیا جائے اور ہر ممکن قدم اٹھایا جائے۔ یہاں قابل ذکر ہے کہ یوگی آدتیہ ناتھ حکومت نے حکم دیا ہے کہ صفائی مہم جنگی پیمانے پر چلائی جائے، اور وزیر اعلیٰ نے اسپتالوں کو مشکل حالات سے نمٹنے کے لیے تیار رہنے کو بھی کہا ہے جس پر طبی افسران باریکی سے نظر رکھ رہے ہیں۔

قومی آواز اب ٹیلی گرام پر بھی دستیاب ہے۔ ہمارے چینل (qaumiawaz@) کو جوائن کرنے کے لئے یہاں کلک کریں اور تازہ ترین خبروں سے اپ ڈیٹ رہیں۔