وزیر اعظم مودی آج دو روزہ دورے پر کیرالہ پہنچیں گے

کوچی: وزیر اعظم نریندر مودی جمعرات کو ریاست کیرالہ کے دو روزہ دورے پر پہنچ رہے ہیں، جہاں وہ متعدد تقاریب میں شرکت کریں گے، کئی پروجیکٹوں کا افتتاح کریں گے، کئی کا سنگ بنیاد رکھیں گے اور مذہبی مقام پر بھی جائیں گے۔

وزیر اعظم مودی شام 4.25 بجے خصوصی طیارے کے ذریعے کوچین انٹرنیشنل ایئرپورٹ لمیٹڈ (سی آئی اے ایل) پہنچیں گے۔ ہوائی اڈے کے قریب ایک عوامی اجلاس میں شرکت کے بعد، وزیر اعظم شام 5.05 بجے سڑک کے ذریعے کلاڈی میں واقع شری آدی شنکر جنم بھومی مندر کے درشن کے لیے روانہ ہوں گے۔ وہاں پوجا ارچنا کے بعد وہ بذریعہ سڑک سی آئی اے ایل کنونشن سینٹر کے لیے روانہ ہوں گے۔

وزیر اعظم مودی شام 6 بجے کوچی میٹرو اور انڈین ریلوے کے مختلف پروجیکٹوں کا افتتاح کریں گے۔ وہ کوچی میٹرو فیز 2 کا سنگ بنیاد رکھیں گے اور فیز 1 اے کا افتتاح کریں گے۔ مجوزہ کوچی میٹرو فیز 2 کوریڈور 11.2 کلومیٹر کا فاصلہ طے کرے گا، جو جواہر لال نہرو (جے ایل این ) اسٹیڈیم میٹرو اسٹیشن سے انفوپارک، کاکناڈ تک 11 اسٹیشنوں کا احاطہ کرے گا۔ بعد میں، وہ ایم آئی 17 ہیلی کاپٹر میں سی آئی اے ایل سے کوچی کے آئی این ایس گروڑ ایئر اسٹیشن کے لیے روانہ ہوں گے۔

وہ سڑک کے ذریعے تاج مالابار کے لیے روانہ ہوں گے اور شام 7.30 بجے وہاں پہنچیں گے۔ وہ شام دیر گئے تاج مالابار میں ریاستی بھارتیہ جنتا پارٹی (بی جے پی) کی کور کمیٹی کی میٹنگ میں بھی شرکت کریں گے۔

وزیر اعظم مودی جمعہ کو صبح 9.30 بجے یہاں کوچین شپ یارڈ لمیٹڈ میں پہلے دیسی طیارہ بردار بحری جہاز 'آئی این ایس وکرانت' کو فوج کے لیے وقف کریں گے۔ بعد میں وہ آئی این ایس گروڑ ایئر اسٹیشن کے لیے روانہ ہوں گے۔ پھر وہ منگلورو جانے کے لیے صبح 11.50 بجے سی آئی اے ایل پہنچیں گے۔

پروجیکٹ کے افتتاح کے موقع پر کیرالہ کے گورنر عارف محمد خان، وزیر اعلیٰ پنارائی وجین، کوچی کے میئر ایم انیل کمار، ایم پی ہیبی ایڈن، کیرالہ کے وزیر ٹرانسپورٹ انٹونی راجو، کیرالہ کے وزیر صنعت پی راجیو اور دیگر اعلیٰ حکام موجود ہوں گے۔ وزیر اعظم کے دورہ کے پیش نظر جمعرات دوپہر سے جمعہ دوپہر تک شہر کے مختلف مقامات پر ٹریفک پابندیاں عائد کی جائیں گی۔