وزیر اعظم مودی کے ہاتھوں ہیروشیما میں مہاتما گاندھی کے مجسمے کی نقاب کشائی

نئی دہلی: وزیر اعظم نریندر مودی نے ہفتہ کو ہیروشیما، جاپان میں مہاتما گاندھی کے ایک عادم قد مجسمے کی نقاب کشائی کی۔ اس موقع پر وزیر اعظم مودی نے کہا کہ امن کے گاندھیائی نظریات پوری دنیا میں گونجتے ہیں اور لاکھوں لوگوں کو طاقت دیتے ہیں۔

ایک ٹوئٹ میں مودی نے کہا کہ ’’میں نے ہیروشیما میں مہاتما گاندھی کے مجسمے کی نقاب کشائی کی۔ ہیروشیما میں یہ مجسمہ بہت اہم پیغام دیتا ہے۔ امن اور ہم آہنگی کے گاندھیائی نظریات عالمی سطح پر گونجتے ہیں اور لاکھوں لوگوں کو طاقت دیتے ہیں۔‘‘

انہوں نے مہاتما گاندھی کے مجسمے کے سامنے دعا کرتے ہوئے اپنی تصویر بھی لگائی۔ اس سے پہلے دن میں وزیر اعظم نے اپنے جاپانی ہم منصب فیومیو کیشیدا سے بھی ملاقات کی۔

وزیر اعظم مودی نے ایک ٹوئٹ میں کہا کہ آج صبح پی ایم کشیدا کے ساتھ ایک بہترین ملاقات ہوئی۔ ہم نے ہندوستان-جاپان تعلقات کی مکمل رینج کا جائزہ لیا اور دنیا کی بہتری کے لئے ہندوستان کی جی-20 صدارت اور جاپان کی جی-7 صدارت پر تبادلہ خیال کیا۔

خیال رہے کہ وزیر اعظم مودی جی-7 سربراہی اجلاس میں شرکت کے لیے جمعہ کو جاپان کے ہیروشیما پہنچے، جہاں وہ مختلف عالمی رہنماؤں کے ساتھ دو طرفہ ملاقاتیں بھی کریں گے۔ جاپان سے وہ پاپوا نیو گنی کے پورٹ مورسبی جائیں گے۔ مودی وزیر اعظم البانی کی دعوت پر آسٹریلیا کا بھی دورہ کریں گے۔