وزیر اعظم مودی کا لندن پہنچنے پر والہانہ استقبال، ہند-یوکے میں ہونے والے آزاد تجارتی معاہدے پر سبھی کی نظریں

وزیر اعظم نریندر مودی یونائیٹیڈ کنگڈم کے دو روزہ دورے پر جمعرات کو لندن پہنچ گئے۔ برطانیہ کے دفتر خارجہ کی وزیر اور انڈو-پیسفک علاقے کی انچارج کیتھرین ویسٹ نے لندن ہوائی اڈے پر ان کا والہانہ استقبال کیا۔ وزیر اعظم مودی کے اس دورہ میں دونوں ملکوں کے درمیان آزاد تجارتی معاہدہ (ایف ٹی اے) پر ہونے والی پیش رفت پر سبھی کی نظریں ہیں۔

وزیر اعظم نریندر مودی نے لندن پہنچنے پر سوشل میڈیا سائٹ ’ایکس‘ پر پوسٹ کرتے ہوئے لکھا- ’’لندن پہنچ گیا ہوں۔ یہ دورہ ہندوستان اور برطانیہ کے درمیان اقتصادی شراکت داری کو مزید مضبوط کرے گا۔ اس دورہ کا اہم مقصد ہمارے لوگوں کی خوشحالی، ترقی اور روزگار کو فروغ دینا ہوگا۔‘‘

وزیر اعظم نریندر مودی کے لندن پہنچنے پر غیر مقیم ہندوستانیوں میں کافی خوشی دیکھی گئی۔ سبھی نے وزیر اعظم کا گرمجوشی سے استقبال کیا۔ اس دوران نریندر مودی نے بھی کئی لوگوں سے بات کی اور بچوں کو آشیرواد دیا۔

وزیر اعظم مودی کا یو۔کے کا یہ دورہ کافی اہم مانا جا رہا ہے۔ اس دورے کی سب سے خاص بات ہندوستان اور یو۔کے۔ کے درمیان آزاد تجارتی معاہدہ (ایف ٹی اے) پر دستخط مانا جا رہا ہے۔ ہندوستانی وزیر اعظم نریندر مودی اور برطانوی وزیر اعظم کیئر اسٹارمر کی موجودگی میں ایف ٹی اے پر دستخط ہوں گے۔ اس معاہدے سے چمڑے، جوتے اور کپڑوں کی رعایتی شرحوں پر برآمدگی ممکن ہوگی۔ وہیں برطانیہ سے وہسکی اور کاروں کی درآمدگی سستی ہو جائے گی۔

اپنے دورہ کے دوران نریندر مودی برطانوی وزیر اعظم کے ساتھ میٹنگ کریں گے اور دونوں ملکوں کے درمیان دوطرفہ تعلقات پر بات چیت کریں گے۔ اس دورہ کا مقصد ہند۔برطانیہ کے درمیان جامع اسٹریٹیجک شراکت داری (سی ایس پی) کی گروتھ کا جائزہ لینا ہے۔ ساتھ ہی اس دورہ کے دوران وزیر اعظم مودی کنگس چارلس-سوم سے بھی ملاقات کریں گے۔ اس کے بعد وہ 26-25 جولائی کو مالدیپ کے سفر پر روانہ ہو جائیں گے۔