وجے دشمی کے موقع پر صدر جمہوریہ مرمو، نائب صدر رادھاکرشنن اور وزیراعظم مودی نے ہم وطنوں کو دی مبارکباد

نئی دہلی: صدر جمہوریہ دروپدی مرمو، نائب صدر سی پی رادھاکرشنن اور وزیراعظم نریندر مودی نے جمعرات کو ملک کے عوام کو وجے دشمی (دسہرہ) کی مبارکباد پیش کی اور اس موقع کو برائی پر اچھائی اور جھوٹ پر سچ کی فتح کا استعارہ قرار دیا۔ تینوں رہنماؤں نے سوشل میڈیا پلیٹ فارم ’ایکس‘ پر اپنے پیغامات کے ذریعے قوم کو امن، خوشحالی اور بھائی چارے کا پیغام دیتے ہوئے امید ظاہر کی کہ یہ تہوار سب کو انصاف، برابری اور اتحاد کی راہ پر چلنے کی تحریک دے گا۔

صدر جمہوریہ دروپدی مرمو نے اپنے پیغام میں کہا، ’’وجے دشمی کے مبارک موقع پر میں سبھی ہم وطنوں کو دلی مبارکباد اور نیک تمنائیں پیش کرتی ہوں۔ یہ تہوار دھرم کی ادھرم پر جیت کا استعارہ ہے اور ہمیں سچائی و انصاف کے راستے پر چلنے کی ترغیب دیتا ہے۔‘‘

انہوں نے مزید کہا کہ ملک کے مختلف حصوں میں راون دہن (نذرآتش کرنا) اور درگا پوجا کی صورت میں منایا جانے والا یہ تہوار ہندوستان کی عظیم زندگی کی اقدار کو اجاگر کرتا ہے۔ صدر نے زور دیا کہ یہ موقع ہمیں غصے اور غرور جیسی منفی عادات کو چھوڑ کر جدوجہد اور شجاعت جیسی مثبت قدروں کو اپنانے کی نصیحت دیتا ہے۔ ان کے مطابق، ’’میری دعا ہے کہ یہ تہوار ہمیں ایسے سماج اور ملک کی تعمیر کے لیے آمادہ کرے جہاں سبھی لوگ انصاف، مساوات اور ہم آہنگی کے ساتھ ترقی کریں۔‘‘

نائب صدر سی پی رادھا کرشنن نے بھی ملک کے عوام کو وجے دشمی کی نیک تمنائیں دیں۔ نائب صدر دفتر کی جانب سے ’ایکس‘ پر جاری پیغام میں کہا گیا، ’’وجے دشمی کے اس مبارک موقع پر دل کی گہرائیوں سے مبارکباد۔ یہ تہوار برائی پر اچھائی کی جیت کا جشن ہے اور ہمیں سچائی، دھرم اور حوصلے جیسے دائمی اقدار کی یاد دلاتا ہے۔‘‘ پیغام میں مزید کہا گیا کہ یہ تہوار ہمیں ایمانداری سے کام کرنے، انصاف قائم رکھنے اور معاشرے میں مثبت کردار ادا کرنے کی تحریک دیتا ہے۔ نائب صدر نے دعا کی کہ یہ دن سبھی کے لیے خوشی، امن اور خوشحالی لے کر آئے اور ملک کی خدمت کے جذبے کو مزید مضبوط بنائے۔

وزیراعظم نریندر مودی نے بھی وجے دشمی کی مبارکباد دی اور لکھا، ’’وجے دشمی برائی اور جھوٹ پر اچھائی اور سچائی کی فتح کا نشان ہے۔ میری دعا ہے کہ اس موقع پر ہر ایک کو حوصلے، دانائی اور بھکتی کے راستے پر مسلسل آگے بڑھنے کی تحریک ملے۔‘‘ وزیراعظم نے ملک بھر کے عوام کو دل سے نیک تمنائیں پیش کرتے ہوئے کہا کہ یہ دن سب کے لیے اتحاد، بھائی چارے اور خدمت کے جذبات کو فروغ دے۔

خیال رہے کہ وجے دشمی کو ہندوستان کے مختلف حصوں میں مختلف انداز سے منایا جاتا ہے۔ شمالی ہند میں راؤن دہن کے ذریعے برائی پر اچھائی کی جیت کو یاد کیا جاتا ہے، تو مشرقی اور شمال مشرقی حصوں میں درگا پوجا کے اختتام کے ساتھ یہ تہوار منایا جاتا ہے۔ عوامی اجتماعات، ثقافتی پروگرام اور مذہبی رسومات اس دن کو مزید خاص بناتے ہیں۔