مہاراشٹر میں اقلیتوں کے لیے پولیس میں بھرتی کی پری ٹریننگ کاآغاز

مہاراشٹر میں اقلیتوں کے لیے پولیس میں بھرتی کی پری ٹریننگ کاسلسلہ شروع ہوچکا ہے،اس تعلق سے رائے گڑھ ضلع میں انجمن درد مندا نِ تعلیم و ترقی مہاڈ نے کامبلا کیمپس میں 35 امیدواروں کاٹریننگ کے لئے انتخاب کیا ہے۔

واضح رہے کہ حکومت مہاراشٹرا کے اقلیتی شعبہ کی جانب سے ضلعی سطح پر ہر ضلع سے 100 اقلیتی نوجوانوں کو مفت پولیس ٹریننگ کا اعلان کیا گیا تھا اور اس سلسلہ میں ایک نوٹیفیکیشن جاری کیا گیا تھا جس کے بعد کئی اضلاع میں فري پری ٹریننگ کا سلسلہ شروع ہو گیا ،لیکن مختلف وجوہات اور مسلم نوجوانوں کی عدم دلچسپی کے سبب کئی اضلاع میں اب تک اس ٹریننگ کا ایک بار بھی اہتمام نہیں ہو سکا۔

امسال مہاراشٹر کے چند سر کردہ افراد نے مشن مہاراشٹرپولیس بھر تی 2020 کے بینر پر ریاست میں اقلیتی اُمید واروں کی رہنمائی کا بیڑا اٹھایا اور پوری ریاست میں بیداری تحریک چلائی اور اُمید واروں سے آن لائن بائیو ڈیٹا طلب کیے، ضلعی سطح پر اُن کے گروپ بنائے گئے۔

رائے گڑھ ضلع کے مہاڈ شہر کی اہم ملّی تنظیم انجمن دردمندانِ تعلیم و ترقی نے پہل کی جس کے سبب حکومت کے اقلیتی محکمے نے ضلع میں 100 اقلیتی نوجوانوں کو مفت پری پولیس ٹریننگ کی ذمہ داری اُنہیں دی ہے۔

انجمن درد مندان نے امیدواروں کے انتخاب کے لئے کل مہاڈ کے نزد واقع کامبلا کے اپنے تعلیمی کیمپس میں ایک رہنمائی اور آرینٹیشن کیمپ کا انعقاد کیا تھا جس میں 35 اُمید واروں کا انتخاب عمل میں آیا۔ بقیہ اُمید وارو ں کے لئے مزید ایک اور کیمپ کا انعقاد ہوگا۔تربیت کے اس سیشن میں شاہ رخ سر نے اُمید واروں کا فزیکل میژر منٹ لیا اور انہیں فزیکل ٹیسٹ کے رموز و نکات سمجھائے جبکہ سہیل سر نے مراٹھی زبان میں سوالات کے حل کی ٹیکنیک سمجھائی۔

مفتی رفیق نے نوجوانوں کی ہمت افزائی کی اور اُمید ظاہر کی کی اس بار رائے گڑھ ضلع سے پوری بیچ ٹریننگ میں شریک ہوگی۔

مفتی رفیق کی صدارت میں ہوئے اس پورے دن کے پروگرام کے الگ الگ سیشن کی جناب دلدار پرکر ،
مفتی مظفر سین اور مفتی سعود مھاڈکر نے نظامت سنبھالی، مفتی خالد جھٹام صاحب،حافظ تابش انتو لے صاحب اور حافظ یاسرناڈکر صاحب نے پروگرام کو کامیاب کرنے میں مکمل تعاون کیا۔اس رہنمائی و تربیتی کیمپ میں ممبئی سے معروف سماجی رہنما سلیم الوا رے نے بطور مہمان خصوصی شرکت کی اور نوجوانوں کو سرکاری ملازمتوں کی اہمیت اور اس کے حصول کے طریقہ کار سمجھائے۔ اسٹار فاؤنڈیشن کے ڈاکٹر دانش لامبے نے نوجوانوں کو آن لائن/آف لائن تحریری امتحان کے نصاب اور ماڈل سوالنامہ کے بابت تفصیل فراہم کی۔