کورونا ٹیسٹ کے لیے آن لائن بکنگ شروع، گھر سے لیے جائیں گے نمونے

کورونا ٹیسٹ کے لیے اب آپ آن لائن بکنگ کر سکتے ہیں۔ پریکٹو نے اعلان کیا ہے کہ کووڈ-19 ٹیسٹ کرانے کے لیے آن لائن بکنگ کو ممکن بنایا گیا ہے اور اس کے لیے کمپنی نے تھائروکیئر کے ساتھ پارٹنرشپ کی ہے۔

کورونا ٹیسٹ
کورونا ٹیسٹ
user

قومی آوازبیورو

کورونا وائرس کا پتہ لگانے کے لیے ٹیسٹ کرانا بہت اہم ہے۔ کسی کو اگر کھانسی، زکام اور بخار ہو تو ضروری نہیں کہ وہ کورونا وائرس کی زد میں ہو۔ آپ کو کورونا ہے یا نہیں، یہ صرف کورونا ٹیسٹ کے ذریعہ ہی پتہ لگایا جا سکتا ہے۔ یہی وجہ ہے کہ دنیا بھر میں اس وقت کورونا ٹیسٹ کٹ کی طلب بڑھ گئی ہے۔ اس درمیان خبر ہے کہ ہندوستان میں کورونا ٹیسٹ کے لیے آن لائن بکنگ کی جا سکتی ہے۔ دراصل پریکٹو کمپنی نے اعلان کیا ہے کہ کووڈ-19 ٹیسٹ کرانے کے لیے آن لائن بکنگ کرائی جا سکتی ہے اور اس کے لیے کمپنی نے تھائروکیئر کے ساتھ پارٹنر شپ کی ہے۔

پریکٹو کا کہنا ہے کہ تھائروکیئر کے ساتھ مل کر کووڈ-19 ڈکٹیشن ٹیسٹ کیا جا رہا ہے اور اسے حکومت ہند نے منظوری بھی دے دی ہے۔ اس کے ساتھ ہی انڈین کونسل آف میڈیکل ریسرچ یعنی آئی سی ایم آر سے بھی منظوری مل گئی ہے۔ پریکٹو کے مطابق "فی الحال ممبئی کے لوگوں کے لیے ٹیسٹ آن لائن دستیاب ہے اور جلد ہی اسے پورے ملک کے لیے دستیاب کرایا جائے گا۔ اس کے لیے ڈاکٹر کے ذریعہ دیئے گئے نسخہ کی ضرورت ہوگی اور ٹیسٹ کے لیے ضروری فارم بھرنا ہوگا جس کے بعد ڈاکٹر اس پر دستخط کریں گے۔ ٹیسٹنگ کے دوران فوٹو شناختی کارڈ کی بھی ضرورت ہوگی۔"

پریکٹو کی طرف سے ملی جانکاری کے مطابق کورونا ٹیسٹ کی آن لائن بکنگ کرانے کے لیے لوگوں کو کمپنی یا تھائروکیئر کی آفیشیل ویب سائٹ پر جانا ہوگا۔ ساتھ ہی انھیں اس ٹیسٹ کے لیے 4500 روپے دینے ہوں گے۔ کمپنی کا کہنا ہے کہ سیمپل کلیکشن کے لیے بھیجے گئے نمائندہ آئی سی ایم آر کے ذریعہ جاری کیے گئے سبھی ضابطوں پر عمل کریں گے۔ ٹیسٹنگ کے لیے سویب وائرل ٹرانسپورٹ میڈیم کے ذریعہ کلیکٹ کیے جائیں گے۔ اسے کولڈ چین میں تھائروکیئر لیباریٹری بھیجا جائے گا جسے کووڈ-19 ٹیسٹنگ کے لیے منتخب کیا گیا ہے۔

Published: 31 Mar 2020, 5:30 PM