’سیاست تقریر یا ذہانت نہیں، احساس ہے‘- راہل گاندھی نے اومن چنڈی کو انسان دوستی کی علامت قرار دیا

کوٹایم: کانگریس کے رہنما اور لوک سبھا میں قائد حزب اختلاف راہل گاندھی نے سیاست میں انسانی احساسات اور ہمدردی کی اہمیت پر زور دیتے ہوئے کہا ہے کہ ایک سیاست دان کی اصل خوبی اس کی تقریر یا دانش نہیں بلکہ یہ ہے کہ وہ دوسروں کا درد کتنا محسوس کرتا ہے۔ راہل گاندھی کی یہ گفتگو کیرالہ کے سابق وزیر اعلیٰ اومن چنڈی کی یاد میں ہوئی، جنہیں انہوں نے عوامی خدمت کا پیکر اور جذباتی سیاست کا نادر نمونہ قرار دیا۔

کوٹایم کے سینٹ جارج آرتھوڈوکس چرچ میں اومن چنڈی کی یادگار پر پھول چڑھانے کے بعد راہل گاندھی نے کہا کہ انہوں نے سیاست میں 21 سال گزارے ہیں اور اس دوران بہت سے قسم کے سیاست دان دیکھے ہیں، کچھ بڑے زبردست بولنے والے، کچھ بہت ذہین، کچھ ایسے جو موضوعات پر پی ایچ ڈی جیسے خیالات دیتے ہیں لیکن جلد ہی انہیں یہ احساس ہوا کہ عوام ان چیزوں سے زیادہ متاثر نہیں ہوتے۔

انہوں نے کہا، ’’آپ کسی کسان کو دیکھیں، تو کیا صرف اسے کسان کے طور پر دیکھتے ہیں یا اس انسان کے طور پر جو بارش نہ ہونے کے خوف میں جیتا ہے؟ کیا آپ اس کے بچوں کی فکر محسوس کرتے ہیں؟ یہی سیاست کی اصل بنیاد ہے، احساس، جو اندر سے آتا ہے۔‘‘

راہل گاندھی نے مثال دی، ’’وائناڈ میں انسان اور جانور کے درمیان تصادم عام ہے، جہاں لوگ ہاتھی یا شیر کے حملوں میں جان گنواتے ہیں۔ آپ وہاں جا کر لمبی تقریر کر سکتے ہیں کہ ہم کیا کریں گے لیکن اصل سیاست یہ ہے کہ آپ ان خاندانوں کے دکھ کو محسوس کریں، بچوں کے خوف کو سمجھیں اور اس شخص کی حالت تصور کریں جس پر حملہ ہوا۔‘‘

انہوں نے واضح کیا، ’’اگر سیاست دان کو احساس پیدا کرنا ہے تو اسے لالچ، غصے اور خوف پر قابو پانا ہوگا۔ کبھی آپ کسی رہنما کے ساتھ دوپہر کا کھانا کھا رہے ہوں، اور وہ ویٹر سے بدتمیزی کرے—تو میں سب کچھ سمجھ جاتا ہوں۔ کیونکہ احساس آپ کے رویے سے ظاہر ہوتا ہے، نہ کہ الفاظ سے۔‘‘

اومن چنڈی کے حوالے سے راہل گاندھی نے جذباتی انداز میں کہا، ’’وہ نہ صرف کانگریس کے ایک بڑے رہنما تھے بلکہ جذباتی سیاست کے استاد بھی تھے۔ ’بھارت جوڑو یاترا‘ کے دوران جب ڈاکٹروں نے انہیں پیدل نہ چلنے کا مشورہ دیا، تب بھی وہ پیچھے ہٹنے کو تیار نہ تھے۔ ہمیں زبردستی انہیں کار میں بٹھانا پڑا۔ یہ عزم صرف وہی شخص دکھاتا ہے جو دل سے عوام سے جڑا ہو۔‘‘

راہل گاندھی نے کہا کہ کیرالہ کی سیاست میں ایسی شخصیات کی روایت رہی ہے اور ان کی خواہش ہے کہ کانگریس میں اومن چنڈی جیسے مزید رہنما پیدا ہوں، جو خدمت، انکساری اور احساس کے جذبے سے سیاست کریں۔