بہار میں راجیہ سبھا انتخاب کو لے کر سیاسی ہلچل تیز، تیجسوی یادو سے ملے اے آئی ایم آئی ایم ریاستی صدر اختر الایمان

بہار میں راجیہ سبھا انتخاب کو لے کر سیاسی سرگرمیاں تیز ہو گئی ہیں۔ راجدھانی پٹنہ میں اپوزیشن لیڈر تیجسوی یادو نے اسمبلی احاطہ میں مہاگٹھ بندھن کے لیڈران سے ملاقات کی اور انتخابی حکمت عملی پر تبادلہ خیال کیا۔ خاص طور پر راجیہ سبھا کی پانچویں سیٹ کے متعلق اتفاق رائے بنانے کی کوششیں تیز ہو گئی ہیں۔

اس دوران اے آئی ایم آئی ایم بہار کے ریاستی صدر اختر الایمان نے بھی تیجسوی یادو سے ملاقات کی۔ اس کے بعد اختر الایمان نے کہا کہ ان کی پارٹی پہلے سے راجیہ سبھا سیٹ کے لیے دعویداری کر چکی ہے اور وہ چاہتے ہیں کہ مہاگٹھ بندھن ان کے امیدوار کی حمایت کرے۔ ساتھ ہی انہوں نے کہا کہ آنے والے دنوں میں ایک دوسرے کی ضرورت پڑے گی، اس لیے اس بار حمایت ملنی چاہیے۔

تیجسوی یادو نے کہا کہ مہاگٹھ بندھن پوری تیاری میں ہے اور بہار کی پانچویں راجیہ سبھا سیٹ کے لیے امیدوار اتارا جائے گا۔ انہوں نے دعویٰ کیا کہ نمبر ان کے حق میں ہیں اور وہ انتخاب میں جیت حاصل کریں گے۔ امیدوار کا اعلان جلد کیا جائے گا۔ حالانکہ اے آئی ایم آئی ایم کی حمایت پر انہوں نے غور کرنے کی بات کہی ہے۔

دوسری جانب این ڈی اے میں بھی سیٹ کی تقسیم کے متعلق بات چیت جاری ہے۔ 27 اور 28 فروری کو سینئر لیڈران کی میٹنگ متوقع ہے، جس میں حتمی فیصلہ لیا جا سکتا ہے۔ جے ڈی یو کے سینئر لیڈر اور وزیر وجے کمار چودھری نے کہا کہ پارٹی کے اندر بات چل رہی ہے اور سب طے ہونے کے بعد میڈیا کو مطلع کر دیا جائے گا۔

اس درمیان اپیندر کشواہا کی پارٹی آر ایم ایل اے اور چراغ پاسوان کی پارٹی آر ایل جے پی نے بھی اپنی اپنی دعویداری پیش کر دی ہے، جس کی وجہ سے سیٹ کو لے صورتحال مزید پیچیدہ ہو گئی ہے۔ راجیہ سبھا کی پانچویں سیٹ کے لیے دونوں اتحادوں میں حکمت عملی سے متعلق میٹنگوں کا دور جاری ہے۔ آنے والے دنوں میں امیدواروں کے نام سامنے آنے کے ساتھ ہی سیاسی تصویر مزید واضح ہو جائے گی۔