لاک ڈاؤن: پولس افسر اودھ سنگھ نے پیش کی نظیر، ضرورت مندوں کو ای-رکشہ سے پہنچا رہے مدد 

مہوبہ: کورونا وائرس کے خطرات کے درمیان ملک گیر لاک ڈاؤن کے درمیان غریبوں و بے سہارا لوگوں کی مدد کے لئے بندیل کھنڈ خطے کے ضلع مہوبہ میں ایک پولیس افسر خود رکشہ چلا کر محتاجوں کے لئے راحت رسانی کا کام کر رہے ہیں۔ اطلاعات کے مطابق ضلع کے کلپاڑ سرکل میں تعینات پولیس سرکل افسر اودھ سنگھ بے سہارا اور ضرورت مندوں کی مدد کے لئے بذات خود تنگ گلیوں میں ای۔رکشہ چلا کر لوگوں کے درمیان کھانے ۔پینے اور دیگر ضروری اشیاء تقسیم کر رہے ہیں۔

پولیس کے رعب و دبدبہ سے پرے تنگ گلیوں میں بے سہاروں کا سہار بنے اودھ سنگھ کا یہ جدا انداز نہ صرف یہ کہ عوام کا دل جیت رہا ہے بلکہ کورونا بحران کے دوران ملک کے دیگر افسران کے لئے ایک نئی نظیر پیش کر رہا ہے۔اودھ سنگھ کے مطابق یہ ایسا موقع ہے جب پولیس جوانوں کو اپنی ڈیوٹی کی ادائیگی کرتے ہوئے انسانیت کی خدمت کا بہتر موقع ملا ہے۔ سب۔انسپکٹر ملک میں پیدا ہوئے ان حالات کو پولیس کے لئے ایک نیا چیلنج مانتے ہیں۔

اودھ سنگھ نے بتایا کہ شہری علاقوں کے علاوہ دیہی علاقوں کی تنگ گلیوں میں ان کی سرکاری کار کے نہ گھوم پانے کی وجہ سے اکثر پریشانیوں کا سامنا کرنا پڑتا تھا اور لوگوں تک کھانے پینے کی اشیاء پہنچانے میں کافی دقت ہوتی تھی۔ لیکن اب بیٹری رکشہ سے ہر ضرورت مند تک اشیا پہنچانے اور اس کی مدد کرنے میں کافی سہولت ہوگئی ہے۔

لاک ڈاؤن میں کاروبار پوری طرح سے بند ہوجانے کی وجہ سے ضلع میں روز کمانے کھانے والے سینکڑوں پریوار فاقہ کشی کے دہانے پر ہیں۔ ان کے سامنے کھانے پینے کا مسئلہ کھڑا ہوگیا ہے۔ اس موقع پر ضرورت مند افراد کی مدد کے لئے مختلف سماجی تنظیمیں اپنی اپنی سطح سے کام کر رہی ہیں۔ اس کام میں پولیس سرکل افسر اودھ سنگھ کا یہ نرالا اور ہر غریب کو گلے لگا کر اس کا دکھ درد کا مداوا کرنے کے انداز نے لوگوں کا دل جیت لیا ہے۔