دیوالی اور چھٹھ پر گھر جانے کے لیے مسافر پریشان، دہلی اور ممبئی میں زبردست بھیڑ، سورت میں ٹرین پکڑنے کے لیے 2 کلو میٹر لمبی لائن

دیوالی ہندوستان کا قومی تہوار ہے جسے لوگ اپنے خاندان کے ساتھ ہی منانا چاہتے ہیں خواہ وہ کہیں بھی ہوں وہیں چھٹھ کے عقیدتمند بھی اس موقع پراپنے گھر کا رُخ کرتے ہیں اورایسے موقع پرجب وہ گھرنہ جاسکیں توان کے دل پر کیا گزرتی ہوگی۔ کچھ یہی حال آج کل ملک کے سبھی ریلوے اسٹیشنوں، بس اڈوں اور دیگرسفری ذرائع کے مقامات پر دیکھا جارہا ہے جہاں مسافروں کی لمبی لمبی لائنیں لگی ہوئی ہیں۔خاص طور پر دیوالی اور چھٹھ کے موقع پر اتر پردیش، بہار اور جھارکھنڈ جانے والے مسافروں کی زبردست بھیڑ دیکھی جارہی ہے۔

ملک کی راجدھانی میں نئی دہلی ریلوے اسٹیشن سے لے کر ملک بھر کے دیگر شہروں تک ریلوے اسٹیشنوں پر بھاری بھیڑ دیکھی جارہی ہے۔ ہفتہ کی شام گجرات کے سورت میں ادھنا ریلوے اسٹیشن پر بھی ایسی ہی صورتحال دیکھی گئی۔ یہاں ٹرین پکڑ کر اپنے شہر جانے کے لیے مسافروں کی لمبی لائن دیکھی گئی۔ یہ مسافر اتوار کو روانہ ہونے والی مختلف ہفتہ وار اور خصوصی ٹرینوں میں سفر کرنے کے لیے لائن لگا کر بیٹھے ہوئے تھے۔

ادھنا ریلوے اسٹیشن کے پلیٹ فارم نمبر 6 سے تقریباً دو کلو میٹر دور مسافروں کی لمبی لائن لگی تھی۔ اسٹیشن احاطے میں احاطے کے باہر لمبایت علاقے میں مسافروں کی لمبی قطاریں لگ گئی تھیں جس کی تصاویر لرزا دینے والی ہیں۔ سورت کے ادھنا ریلوے اسٹیشن کے احاطے اور اسٹیشن کے باہر رات کے اندھیرے میں اور کھلے میدان میں مسافروں کی لائن سنیچر کی رات سے ہی لگ گئی تھی۔ اتوار کی صبح اور دوپہر کو ٹرین میں بھیٹنے کے لئے مزدور مسافر 12 گھنٹے پہلے ہی لمبی لائن لگا کر دھول مٹی میں بیٹھے ہوئے تھے۔ جن میں بچے، بوڑھے اور خواتین بھی شامل ہیں۔

ان خبروں کے درمیان ریلوے کے مرکزی وزیر اشونی ویشنو ہفتہ کو نئی دہلی ریلوے اسٹیشن پر بھیڑ کو کنٹرول کرنے کی تیاریوں کا جائزہ لینے پہنچے۔ اس دوران ریلوے کے وزیر نے کہا کہ آج بہت رش والا دن مسافروں کی سہولت کے لیے اسٹیشن پر مسافر سہولت سینٹراور اضافی ٹکٹنگ کاونٹر قائم کیے گئے ہیں۔ ریلوے کے وزیر نے بتایا کہ ہفتہ کو تقریباً 175,000 مسافر اسٹیشن پر پہنچے، جن میں سے 75,000 جنرل کٹیگری کے مسافر تھے۔

تیوہاروں کے اس مصروف سیزن میں بھیڑ کو سنبھالنے کے لیے 12 ہزاراسپیشل ٹرینیں چلائی گئی ہیں تاکہ مسافروں کو اضافی سہولت فراہم کی جاسکے۔ انہوں نے یہ بھی کہا کہ سوشل میڈیا پر گمراہ کن خبریں پھیلانے والوں کے خلاف سخت کارروائی کی جا رہی ہے اور متعدد افراد کے خلاف ایف آئی آر درج کی گئی ہیں۔ بھیڑ پر قابو پانے کے لیے اسٹیشن پر ہولڈنگ ایریاز بنائے گئے ہیں، جہاں نظم و ضبط برقرار رکھنے اور افراتفری کو روکنے کے لیے مسافروں کو منظم طریقے سے داخل کیا جا رہا ہے۔

اسی طرح ہفتہ کو ممبئی کے لوک مانیہ تلک ٹرمینس پر بھی مسافروں کی بڑی بھیڑ دیکھی گئی۔ حالانکہ ریلوے نے مسافروں کی حفاظت اور سہولت کو یقینی بنانے کے لیے وسیع انتظامات کرنے کا دعویٰ کیا ہے۔ خاص طور پر جنرل کوچ کے مسافروں کے لیےالگ الگ رکاوٹیں (بیریکیڈڈ ایریاز) بنائے گئے ہیں، جہاں مسافروں کو منظم انداز میں کھڑا کیا گیا ہے تاکہ کسی طرح کی دھکا مکی یا بھگدڑ کی حالت نہ ہو۔ مختلف ٹرینوں کے لیے الگ الگ بیریکیڈ بنائے گئے ہیں