گاندھی نگر میں عمارت کا ایک حصہ منہدم، کئی افراد کے پھنسے ہونے کا خدشہ

گجرات کے گاندھی نگر کے کڈاسن علاقے میں تعمیر کی جا رہی عمارت اچانک گر گئی، جس میں کئی لوگ پھنس گئے۔ گاندھی نگر فائر آفس کےاہلکار نے بتایا کہ فائر ڈپارٹمنٹ کی ٹیمیں موقع پر بچاؤ کے کام میں مصروف ہیں۔ خدشہ ہے کہ اس میں 10-12 مزدور پھنس سکتے ہیں۔ نائب وزیر اعلی ٰہرش سنگھوی موقع پر پہنچ گئے ہیں۔

یہ حادثہ رات 9:15 کے قریب پیش آیا۔ 'بوسکی دی ایمپائر' نامی زیر تعمیر کمرشل کمپلیکس میں ایک بھاری لوہے کا سلیب اچانک گر گیا۔ اس سے پورے علاقے میں خوف و ہراس پھیل گیا اور کئی مزدوروں کے لوہے اور ملبے تلے دبنے کا خدشہ ہے۔ گاندھی نگر فائر بریگیڈ کی 5 سے زیادہ گاڑیاں اور خصوصی ریسکیو ٹیمیں موقع پر پہنچ گئیں۔ بھاری لوہے کے ڈھانچے اور کنکریٹ کو ہٹانے اور پھنسے ہوئے لوگوں تک پہنچنے کا کام تیزی سے کیا جا رہا تھا۔

اس کمپلیکس میں دو یونٹوں کے درمیان بنایا جا رہا لوہے کا ڈھانچہ اچانک زوردار آواز کے ساتھ گر گیا۔ عینی شاہدین کے مطابق حادثے کے وقت کئی مزدور موقع پر کام کر رہے تھے۔ دھماکے جیسی آواز سن کر آس پاس کے لوگ فوری طور پر موقع پر پہنچ گئے اور امدادی ٹیموں کے پہنچنے سے پہلے ہی لوگوں کو باہر نکالنے کی کوشش شروع کر دی۔ زخمیوں کو فوری علاج اور اسپتال لے جانے کے لیے کئی ایمبولینس گاڑیاں تعینات کی گئی تھیں۔ کچھ زخمیوں کو اسپتال بھیجا گیا ہے۔