کیجریوال اور سسودیا کی بریت پر اپوزیشن کا بی جے پی پر شدید حملہ، عدالتی فیصلے کا خیر مقدم

نئی دہلی: دہلی کے مبینہ شراب گھوٹالہ معاملے میں راؤز ایونیو عدالت کی جانب سے عام آدمی پارٹی کے قومی کنوینر اروند کیجریوال اور پارٹی رہنما منیش سسودیا کو بری کیے جانے کے بعد سیاسی ماحول گرم ہو گیا ہے۔ اپوزیشن جماعتوں نے عدالت کے فیصلے کا خیر مقدم کرتے ہوئے بھارتیہ جنتا پارٹی پر سخت تنقید کی ہے۔

سماجوادی پارٹی کے صدر اکھلیش یادو نے فیصلے کا استقبال کرتے ہوئے کہا کہ آج سچ اور انصاف دونوں کیجریوال کے ساتھ کھڑے ہیں۔ انہوں نے سوشل میڈیا پلیٹ فارم ایکس پر اپنے بیان میں الزام لگایا کہ بی جے پی نے دہلی کے عوام کے اعتماد کے ساتھ کھیل کھیلا ہے۔ ان کے مطابق کوئی بھی الزام اتنا بڑا نہیں ہو سکتا کہ وہ سچ کو چھپا سکے۔ انہوں نے کہا کہ آج ہر ایماندار شخص سکون کی سانس لے رہا ہے۔

پیپلز ڈیموکریٹک پارٹی کی صدر محبوبہ مفتی نے بھی فیصلے پر ردعمل دیتے ہوئے کہا کہ اس سے جانچ ایجنسیوں کے من مانے رویے کی عکاسی ہوتی ہے۔ ان کا کہنا تھا کہ جب تحقیقاتی اداروں کو سیاسی ہتھیار کے طور پر استعمال کیا جاتا ہے تو سب سے زیادہ نقصان انصاف کو پہنچتا ہے۔ انہوں نے کہا کہ عدالت نے پہلی نظر میں کوئی مضبوط معاملہ نہ ہونے کی بات کہی اور ٹھوس شواہد کی کمی کا ذکر کیا، اس کے باوجود برسوں قید میں رکھا گیا۔

تمل ناڈو کے وزیر اعلیٰ ایم کے اسٹالن نے بھی اپنے بیان میں کہا کہ مرکزی حکومت کو قلیل مدتی سیاسی فائدے کے لیے جانچ ایجنسیوں کی ساکھ کو داؤ پر نہیں لگانا چاہیے۔ انہوں نے کیجریوال اور سسودیا کو مبارک باد پیش کرتے ہوئے کہا کہ سچائی آخرکار سامنے آتی ہے۔

کانگریس رہنما پون کھیڑا نے سوال اٹھایا کہ کیا مختلف ریاستی انتخابات کے دوران ہی اپوزیشن رہنماؤں کے خلاف کارروائیاں محض اتفاق ہیں۔ انہوں نے کہا کہ یہ سب عوام کے سامنے ہے اور سیاسی مقاصد کے لیے اداروں کے استعمال پر سنجیدہ سوالات کھڑے ہوتے ہیں۔

ترنمول کانگریس کے رکن پارلیمنٹ ساکیت گوکھلے نے الزام لگایا کہ اپوزیشن کو بدنام کرنے کے لیے من گھڑت مقدمات قائم کیے گئے۔ ان کا کہنا تھا کہ مرکزی جانچ بیورو اور انفورسمنٹ ڈائریکٹوریٹ کو سیاسی ہتھیار کے طور پر استعمال کیا گیا۔ راشٹریہ جنتا دل کے رہنما تیجسوی یادو نے بھی کہا کہ اپوزیشن کے خلاف جھوٹے مقدمات درج کیے جا رہے ہیں اور انتخابی فائدے کے لیے اداروں کا غلط استعمال ہو رہا ہے۔ ان کے مطابق عدالت کی کارروائیوں نے کئی الزامات کی بنیاد کو کمزور کر دیا ہے۔