عمران پرتاپ گڑھی کی میزبانی میں دعوتِ افطار، راہل گاندھی اور ملکارجن کھڑگے سمیت متعدد قائدین شریک

نئی دہلی میں ماہِ رمضان کے موقع پر راجیہ سبھا کے رکن اور کانگریس کے اقلیتی شعبہ کے صدر عمران پرتاپ گڑھی کی جانب سے منعقدہ دعوت افطار میں اپوزیشن جماعتوں کی نمایاں موجودگی دیکھی گئی۔ اس موقع پر لوک سبھا میں قائدِ حزبِ اختلاف راہل گاندھی اور کانگریس صدر ملکارجن کھڑگے سمیت انڈیا اتحاد کے کئی اہم قائدین شریک ہوئے اور روزہ افطار کیا۔

افطار کی اس تقریب میں مختلف اپوزیشن جماعتوں کے ارکانِ پارلیمنٹ اور سیاسی قائدین نے شرکت کی۔ مہمانوں میں کانگریس کے سینئر رہنما سچن پائلٹ، شیوسینا (یو بی ٹی) کے رکن پارلیمنٹ سنجے راؤت اور ترنمول کانگریس کی رکن پارلیمنٹ مہوا موئترا سمیت دیگر قائدین بھی شامل تھے۔ اس موقع پر رہنماؤں نے ایک دوسرے سے ملاقات کی اور ماہِ رمضان کی مبارکباد پیش کی۔

سیاسی حلقوں میں اس افطار تقریب کو صرف مذہبی روایت تک محدود نہیں دیکھا جا رہا بلکہ اسے اپوزیشن جماعتوں کی ممکنہ سیاسی ہم آہنگی اور یکجہتی کے اظہار کے طور پر بھی تعبیر کیا جا رہا ہے۔ رمضان کے اس موقع پر مختلف جماعتوں کے قائدین کا ایک ساتھ جمع ہونا سیاسی مبصرین کے لیے بھی توجہ کا باعث بنا۔

کانگریس پارٹی نے بھی اس افطار تقریب کی تفصیلات سماجی رابطہ کے پلیٹ فارم پر شیئر کیں۔ پارٹی کی جانب سے جاری بیان میں کہا گیا کہ کانگریس اور انڈیا اتحاد کے سینئر قائدین نے رمضان کے بابرکت موقع پر منعقدہ افطار میں شرکت کی اور آپسی بھائی چارے اور محبت کا پیغام دیا۔

تقریب کے میزبان عمران پرتاپ گڑھی نے مہمانوں کا شکریہ ادا کرتے ہوئے کہا کہ مختلف جماعتوں کے قائدین کی شرکت اس بات کی علامت ہے کہ سماجی ہم آہنگی اور باہمی احترام کی روایت کو مضبوط کرنا وقت کی ضرورت ہے۔ انہوں نے کہا کہ رمضان کا مہینہ محبت، برداشت اور انسانیت کے پیغام کو عام کرنے کا موقع فراہم کرتا ہے۔

کانگریس کے جنرل سکریٹری کے سی وینوگوپال نے بھی افطار میں شرکت کی اور اسے خوشگوار شام قرار دیا۔ انہوں نے کہا کہ رمضان کے موقع پر مختلف جماعتوں کے قائدین کا ایک ساتھ بیٹھ کر روزہ افطار کرنا ملک میں اتحاد اور باہمی احترام کی روایت کو مضبوط کرنے کی علامت ہے۔