آپریشن سندھو: ایران سے ہندوستانیوں کی واپسی جاری، 291 افراد کا قافلہ دہلی پہنچا، ایک سری لنکائی شہری بھی شامل

ایران اور اسرائیل کے درمیان کشیدگی کو دیکھتے ہوئے گزشتہ کئی دنوں سے ایران میں پھنسے ہندوستانیوں کو ملک واپس لانے کے لیے حکومت ہند کا آپریشن سندھو جاری ہے۔ اس سلسلے میں پیر کی شام ایران سے ہندوستانی شہریوں کا ایک اور قافلہ نئی دہلی پہنچا۔ اس قافلے کے ذریعہ 290 ہندوستانی اور 1 سری لنکائی شہری کو ایران کے مشہد شہر سے دہلی لایا گیا۔ اس طرح اب تک 2003 ہندوستانیوں کی بحفاظت ملک واپسی ہو چکی ہے۔

کشیدگی کی حالت میں ایران سے ہندوستان لائے گئے لوگ دہلی ایئر پورٹ پر قومی پرچم ترنگے کے ساتھ باہر نکلتے ہوئے دکھائی دیئے۔ وہیں اس میں ایک ہندوستانی طالب علم نے حکومت کا شکریہ ادا کرتے ہوئے کہا کہ ہمیں ہندوستانی سفارت خانہ سے پیغام ملا کہ ہمیں جلد نکالا جائے گا۔ تھوڑی پریشانی ضرور ہوئی، لیکن ہمیں محفوظ اور بہتر طریقے سے ایران سے باہر نکال لیا گیا۔ ہم سبھی محفوظ ہیں اس کے لیے حکومت ہند کا شکریہ۔

وہیں اس کھیپ میں ایران سے محفوظ نکالی گئی سری لنکا کی فاطمہ ایمان نے بھی دہلی پہنچنے پر حکومت ہند کے تئیں اظہار تشکر کیا۔ فاطمہ نے کہا کہ میں بہت اچھا محسوس کر رہی ہوں اور ہر چیز کے لیے مشکور ہوں۔ جب میری یونیورسٹی کے ہندوستانی طلبا کو نکالا جا رہا تھا، تب میں نے سری لنکائی سفارت خانہ سے مدد مانگی۔ وہاں حالات ہر دن خراب ہوتے جا رہے تھے۔ حکومت ہند کا یہ قدم بہت بڑا اور قابل تعریف ہے۔

واضح رہے کہ ہندوستان کو آپریشن سندھو اس لیے چلانا پڑا کیونکہ ایران اور اسرائیل کے درمیان میزائل اور ڈرون حملے کافی تیز ہو گئے تھے، جو ایران میں موجود ہندوستانی شہریوں کے لیے خطرے کی بات تھی۔ ہندوستانی شہریوں کو مشہد (ایران)، یریون (آرمینیا) اور اشغبت (ترکمنستان) جیسے شہروں سے خصوصی چارٹرڈ فلائٹس کے ذریعہ ہندوستان لایا جا رہا ہے۔