کرنٹ لگنے سے مرنے والے شخص کے لواحقین کو ایک کروڑ  روپے دئے جائیں: دہلی کانگریس

دہلی پردیش کانگریس نے قومی راجدھانی کے ممتاز ایل این جے پی اسپتال میں کرنٹ لگنے سے ایک شخص کی موت پر گہرے غم کا اظہار کیا اور مرنے والوں کے لواحقین کے لئے ایک کروڑ روپے کے معاوضے کا مطالبہ کیا۔

ریاستی کانگریس کے سینئر ترجمان ڈاکٹر نریش کمار نے اتوار کو یہاں جاری ایک بیان میں کہا کہ اس سلسلے میں وزیر اعلیٰ اور لیفٹیننٹ گورنر کو میمورنڈم دے کر بجلی کمپنی کے خلاف فوجداری مقدمہ درج کر کے مرنے والے کے زیر کفالت فرد کو ملازمت اور ایک کروڑ روپے معاوضہ دینے کا مطالبہ کیا گیا ہے۔

انہوں نے کہا کہ جب بجلی کمپنی بجلی چوری کا معاملہ درج کرتی ہے تو بجلی کمپنی کے خلاف بھی کرنٹ لگنے سے ہلاکت کا معاملہ درج کیا جانا چاہئے۔ انہوں نے الزام لگایا کہ دہلی میں اس طرح کے واقعات روزانہ کی بنیاد پر ہو رہے ہیں اور کوئی قدم اٹھانے کے بجائے دہلی حکومت ہاتھ پر ہاتھ دھرے بیٹھی ہے۔

ڈاکٹر کمار نے بتایا کہ موصولہ اطلاع کے مطابق ایل این جے پی اسپتال کی زیر تعمیر عمارت کے تہہ خانے میں بجلی کے تار کھلے پڑے تھے۔ بیسمینٹ میں پانی بھرا ہوا تھا۔ اسی دوران عمارت کی تعمیر میں مزدوری کرنے والا نوجوان وہاں پہنچا اور کرنٹ لگنے سے اس کی موت ہوگئی۔