اولا-اوبر پر بھی کورونا کا پڑا اثر، ہندوستان میں ’شیئرنگ‘ سہولت بند

کورونا وائرس سے اب تک دنیا بھر میں 11 ہزار سے زیادہ لوگوں کی موت ہو گئی ہے۔ ہندوستان میں بھی کورونا وائرس سے پانچ لوگوں کی موت ہو چکی ہے جب کہ تقریباً 300 لوگ اس وبا کی زد میں ہیں۔ اس وبا کا مستقبل کیا ہونے والا ہے اس کا اندازہ اس بات سے لگایا جا سکتا ہے کہ گزشتہ 24 گھنٹوں میں اٹلی میں 600 سے زیادہ لوگوں کی موت ہوئی ہے جب کہ ہزاروں نئے کیس سامنے آئے ہیں۔

کورونا کا قہر ملک کے ہر سیکٹر میں دیکھنے کو ملا ہے۔ پھر چاہے وہ بڑی بڑی مشہور کمپنیاں ہوں یا چھوٹے دکاندار۔ اس وبا کا اثر کیب سروس مہیا کرانے والی کمپنیاں اولا اور اوبر پر بھی دیکھنے کو ملا ہے۔ رپورٹ کے مطابق گزشتہ کچھ دنوں میں ان دونوں کمپنیوں کی بکنگ میں زبردست گراوٹ آئی ہے۔ کورونا وائرس کے بڑھتے خطرے کو دیکھتے ہوئے اولا اور اوبر دونوں نے اب شیئرنگ رائیڈ پر روک لگا دی ہے۔ یعنی جو لوگ اولا کی 'شیئر' اور اوبر کی 'پول' سروس کا فائدہ اٹھاتے تھے، وہ وقتی طور پر یہ فائدہ نہیں اٹھا سکیں گے۔

اولا نے ایک بیان میں کہا ہے کہ "کورونا وائرس کے پھیلاؤ کو روکنے کی کوششوں کے تحت کمپنی 'اولا شیئر' سہولت کو اگلے اطلاع تک غیر مستقل طور پر بند کر رہی ہے۔" کمپنی نے کہا کہ اس کی مائیکرو، منی، پرائم، رینٹل اور آؤٹ اسٹیشن خدمات جاری رہیں گی۔ اسی طرح اوبر کی جانب سے جاری بیان میں کہا گیا ہے کہ "کورونا وائرس کے پھیلاؤ کو کم کرنے میں مدد کے لیے ہم پرعزم ہیں۔ اس لیے جن شہروں میں ہم خدمات دیتے ہیں، ان شہروں میں اوبر پول کی خدمات معطل رہیں گی۔"

واضح رہے کہ اولا اور اوبر دونوں کمپنی کی ان 'شیئر' اور 'پول' سروس کے تحت ایک ہی راستے پر سفر کرنے والے کئی مسافروں کو ایک ساتھ سفر کرنے کی سہولت ملتی ہے۔ اس سفر میں کرایہ کافی کم لگتا ہے۔ یہی وجہ ہے کہ میٹرو پولیٹن شہروں میں اس سہولت کی زبردست ڈیمانڈ رہتی ہے۔