’نوکری نہیں ملے گی تو سنگھاسن ہلے گا‘، پریاگ راج میں ’چھاتروں کی گونج‘ سے قبل راہل گاندھی کا حکومت پر حملہ

نئی دہلی: کانگریس کے سینئر رہنما اور لوک سبھا میں قائد حزب اختلاف راہل گاندھی نے بے روزگاری، سرکاری بھرتیوں میں تاخیر اور امتحانات میں پیپر لیک کے معاملے پر مرکزی حکومت کو سخت تنقید کا نشانہ بناتے ہوئے کہا ہے کہ اگر ملک کے نوجوانوں کو روزگار نہیں ملے گا تو ’سنگھاسن ہلے گا‘۔ انہوں نے اعلان کیا کہ کانگریس کی ’چھاتروں کی گونج‘ مہم اب راجستھان کے کوٹا اور اتراکھنڈ کے دہرادون کے بعد 8 اگست کو اتر پردیش کے پریاگ راج پہنچے گی۔

راہل گاندھی نے سوشل میڈیا پلیٹ فارم ’ایکس‘ پر ایک پوسٹ میں لکھا، ’’نوکری نہیں ملے گی تو سنگھاسن ہلے گا۔‘‘ انہوں نے کہا کہ ملک بھر میں نوجوان بے روزگاری، بھرتیوں میں غیر ضروری تاخیر، امتحانی بے ضابطگیوں اور بار بار ہونے والے پیپر لیک جیسے مسائل سے پریشان ہیں۔ کانگریس ان کی آواز کو ملک بھر میں بلند کرنے کے لیے مسلسل مہم چلا رہی ہے۔

انہوں نے کہا کہ پریاگ راج ایسا شہر ہے جہاں لاکھوں نوجوان مختلف سرکاری ملازمتوں کے لیے برسوں سے مقابلہ جاتی امتحانات کی تیاری کرتے ہیں، درخواستیں جمع کراتے ہیں، فیس ادا کرتے ہیں، لیکن بھرتیوں میں تاخیر اور امتحانی بے ضابطگیوں کے باعث انہیں مایوسی کا سامنا کرنا پڑتا ہے۔ راہل گاندھی نے الزام لگایا کہ پیپر لیک کے واقعات نے نوجوانوں کا حال تباہ کر دیا ہے جبکہ زیر التوا بھرتیوں نے ان کے مستقبل کو غیر یقینی بنا دیا ہے۔

کانگریس رہنما نے حالیہ دنوں دہلی میں اپنے حقوق کا مطالبہ کرنے والے طلبہ کے خلاف پولیس کارروائی کا بھی ذکر کیا۔ انہوں نے دعویٰ کیا کہ احتجاج کرنے والے طلبہ پر لاٹھی چارج کیا گیا اور ان کے خلاف پیلٹ گن کا استعمال بھی ہوا۔ ان کے مطابق، جمہوری نظام میں اپنے حقوق کے لیے آواز اٹھانے والے طلبہ کے ساتھ ایسا رویہ قابل قبول نہیں ہے۔

راہل گاندھی نے کہا کہ کانگریس پارٹی طلبہ اور نوجوانوں کے مسائل کو ہر سطح پر اٹھاتی رہے گی اور انہیں انصاف دلانے کی کوشش جاری رکھے گی۔ انہوں نے حکومت سے مطالبہ کیا کہ امتحانات میں بے ضابطگیوں، پیپر لیک اور طلبہ پر طاقت کے استعمال کے معاملات میں جوابدہی طے کی جائے اور ذمہ دار افراد کے خلاف سخت کارروائی کی جائے۔

انہوں نے کہا کہ ملک کا نوجوان صرف وعدے نہیں بلکہ روزگار، شفاف بھرتی نظام اور محفوظ تعلیمی ماحول چاہتا ہے۔ کانگریس کا کہنا ہے کہ 'چھاتروں کی گونج' مہم کے ذریعے نوجوانوں کے مسائل کو قومی سطح پر اجاگر کیا جائے گا تاکہ حکومت ان کے مطالبات پر سنجیدگی سے غور کرے۔ 8 اگست کو پریاگ راج میں ہونے والے پروگرام میں بڑی تعداد میں طلبہ اور نوجوانوں کی شرکت متوقع ہے۔