نتیش کمار نے ساتویں بار لیا وزیر اعلیٰ عہدہ کا حلف، پہلی مرتبہ کابینہ میں کوئی مسلم چہرہ نہیں

بہار کے سابق نائب وزیر اعلیٰ سشیل مودی نے ایک ٹوئٹ کیا ہے جس میں لکھا ہے کہ ’’نتیش کمار کو ساتویں مرتبہ وزیر اعلیٰ عہدہ کا حلف لینے پر مبارکباد۔ آپ کی قیادت میں بہار مزید آگے بڑھے گا۔‘‘

تصویر سوشل میڈیا
تصویر سوشل میڈیا
user

تنویر

جنتا دل یو سربراہ نتیش کمار نے ساتویں مرتبہ بہار کے وزیر اعلیٰ بننے کا فخر حاصل کر لیا ہے۔ بہار کے گورنر پھاگو چوہان نے نتیش کمار کو آج عہدہ اور رازداری کا حلف دلایا۔ اس موقع پر مرکزی وزیر داخلہ امت شاہ اور بی جے پی صدر جے پی نڈّا بھی موجود رہے۔ نتیش کمار کے علاوہ کچھ دیگر لیڈروں نے بھی حلف لیا جن میں سب سے اہم نام بی جے پی کے تارکشور پرساد اور رینو دیوی کا ہے، ان دونوں کو نائب وزیر اعلیٰ بنایا گیا ہے۔ قابل ذکر بات یہ ہے کہ بہار کی تاریخ میں پہلی مرتبہ ایسا ہوا ہے جب کابینہ میں ایک بھی مسلم چہرہ شامل نہیں ہے۔ دراصل اس بار این ڈی اے کا کوئی بھی مسلم امیدوار فتحیاب نہیں ہو سکا۔

بہر حال، بہار کے سابق نائب وزیر اعلیٰ اور بی جے پی کے سینئر لیڈر سشیل مودی نے نتیش کمار کے ایک بار پھر وزیر اعلیٰ بننے پر انھیں مبارکباد دی ہے۔ سشیل مودی نے اس سلسلے میں ایک ٹوئٹ کیا ہے جس میں لکھا ہے کہ ’’نتیش کمار کو ساتویں مرتبہ وزیر اعلیٰ عہدہ کا حلف لینے پر مبارکباد۔ آپ کی قیادت میں بہار مزید آگے بڑھے گا۔ نریندر مودی کا تعاون بہار کو ہمیشہ ملتا رہے گا۔‘‘


واضح رہے کہ نتیش کمار کی حلف برداری تقریب کا اپوزیشن مہاگٹھ بندھن نے بائیکاٹ کیا ہے۔ آج صبح ہی آر جے ڈی نے ٹوئٹ کر حلف برداری تقریب کی مخالفت کی ۔ ٹوئٹ میں کہا گیا کہ ’’آر جے ڈی حلف برداری کا بائیکاٹ کرتی ہے۔ بدلاؤ کا مینڈیٹ این ڈی اے کے خلاف ہے۔ مینڈیٹ کو ’حکومتی احکام‘ سے بدل دیا گیا ہے۔ بہار کے بے روزگاروں، کسانوں، کانٹریکچوئل ملازمین، غیر مستقل اساتذہ سے پوچھیں کہ ان پر کیا گزر رہی ہے۔ این ڈی اے کے فرضی واڑے سے عوام ناراض ہیں۔ ہم عوامی نمائندہ ہیں اور عوام کے ساتھ کھڑے ہیں۔‘‘

Follow us: Facebook, Twitter, Google News

قومی آواز اب ٹیلی گرام پر بھی دستیاب ہے۔ ہمارے چینل (qaumiawaz@) کو جوائن کرنے کے لئے یہاں کلک کریں اور تازہ ترین خبروں سے اپ ڈیٹ رہیں۔