ولیمسن کی بدولت نیوزی لینڈ کی پوزیشن مضبوط، ایشانت نے لئے 3 وکٹ

کین کی اننگ کی بدولت پہلے ٹیسٹ میچ کے دوسرے دن نیوزی لینڈ کی ٹیم مضبوط پوزیشن میں ہے جبکہ تیز گیند باز ایشانت شرما نے 3 وکٹ لے کر دنیا کی نمبر ایک ٹیم انڈیا کو میچ میں برقرار رکھا

تصویر سوشل میڈیا
تصویر سوشل میڈیا
user

یو این آئی

ویلنگٹن: کین ولیمسن نے 89 رن کی کپتانی کی ذمہ داری والی اننگز کھیلتے ہوئے نیوزی لینڈ کو ہندوستان کے خلاف پہلے کرکٹ ٹیسٹ میچ کے دوسرے دن ہفتہ کو مضبوط پوزیشن میں پہنچا دیا جبکہ تیز گیند باز ایشانت شرما نے تین وکٹ لے کر دنیا کی نمبر ایک ٹیم انڈیا کو میچ میں برقرار رکھا۔

ہندوستان نے بارش سے متاثر پہلے دن پانچ وکٹ کے نقصان پر 122 رن بنائے تھے اور دوسرے دن اس کی پہلی اننگز 165 رن پر سمٹ گئی۔ ولیمسن نے 153 گیندوں میں 11 چوکوں کی مدد سے 89 رن بنائے جس کی بدولت میزبان نیوزی لینڈ نے پانچ وکٹ پر 216 رن بنا کر پہلی اننگز میں 51 رنوں کی اہم برتری حاصل کر لی ہے۔ دوسرے دن کا کھیل خراب روشنی کی وجہ سے مقررہ وقت سے پہلے ختم کرنا پڑا۔ اگرچہ اس وقت تک ہندوستانی گیند باز اپنی فارم حاصل کر چکے تھے۔


اب تیسرے دن ہندوستان کی پوری کوشش ہوگی کہ وہ نیوزی لینڈ کی اننگز کو جلدی سمیٹ کر اسے بڑی برتری حاصل کرنے سے روکے۔ چوٹ سے ابھرکر اس مقابلے میں اترے ایشانت نے شاندار گیند بازی کی اور 15 اوور میں 31 رن دے کر تین وکٹ لئے۔ محمد سمیع کو 17 اوور میں 61 رن پر ایک وکٹ اور آف اسپنر روی چندرن اشون نے 30 اوور میں 60 رن پر ایک وکٹ لیا۔

تیز گیند باز جسپريت بمراه کی خراب فارم ٹیسٹ میں بھی جاری رہی اور وہ 18.1 اوور میں 62 رن پر کوئی وکٹ نہیں لے پائے۔ نیوزی لینڈ کی جانب سے اوپنر ٹام لاتھم نے 11، ٹام بلنڈیل نے 30، راس ٹیلر نے 44 اور ہنری نکولس نے 17 رن بنائے۔ اسٹمپس کے وقت بی جے واٹلنگ 14 اور کولن ڈی گرینڈهوم چار رن بنا کر کریز پر موجود تھے۔

Follow us: Facebook, Twitter, Google News

قومی آواز اب ٹیلی گرام پر بھی دستیاب ہے۔ ہمارے چینل (qaumiawaz@) کو جوائن کرنے کے لئے یہاں کلک کریں اور تازہ ترین خبروں سے اپ ڈیٹ رہیں۔