راجیہ سبھا: اتر پردیش کی 10 اور اتراکھنڈ کی ایک سیٹ پر ووٹنگ 9 نومبر کو
راجیہ سبھا کی 10 سیٹوں کے لئے 9 نومبر کو ووٹ ڈالے جائیں گے جن پر اراکین کا میعاد کار 25 نومبر کو ختم ہو رہا ہے۔ وہیں اتراکھنڈ کی ایک راجیہ سبھا سیٹ کے لئے بھی 9 نومبر کو ہی پولنگ ہوگی
لکھنؤ / دہرادون: اتر پردیش اور اتراکھنڈ کی راجیہ سبھا کی 11 سیٹوں کے لئے 9 نومبر کو ووٹ ڈالے جائیں گے، جن اراکین کا میعاد کار 25 نومبر کو ختم ہو رہا ہے۔
الیکشن کمیشن نے منگل کو راجیہ سبھا کی 11 سیٹوں کے لئے نوٹیفکیشن جاری کر دیا ہے۔ چیف الیکشن کمشنر اجے کمار شکلا نے بتایا کہ ان سیٹوں کے لئے 20 اکتوبر کو نوٹیفکیشن جاری ہونے کے ساتھ پرچہ نامزدگی کا عمل شروع ہو جائے گا، جبکہ نامزدگی کی آخری تاریخ 27 اکتوبر ہوگی۔ 28 نومبر کو کاغذات کی جانچ ہوگی وہیں 2 نومبر تک نام واپس لئے جاسکیں گے۔ 9 نومبر کو صبح 9 تا شام 4 بجے تک ووٹنگ ہوگی اور اسی دن نتائج کے اعلان کا امکان ہے۔
قابل ذکر ہے کہ یو پی کی 10 سیٹوں میں تین بی جے پی کے پاس ہیں جبکہ تین سماج وادی پارٹی (ایس پی) دو کانگریس اور دو بہوجن سماج پارٹی (بی ایس پی) کے کھاتے میں ہیں۔ اسمبلی میں بی جے پی کے اراکین کی تعداد کے لحاظ سے ان انتخاب میں بی جے پی کو کم سے کم چھ سیٹوں کا فائدہ ہونے کا امکان ہے وہیں ایس پی کو دو سیٹوں کا نقصان ہو سکتا ہے۔
اترپردیش کی راجیہ سبھا کی 10 سیٹوں میں بی جے پی کے نیرج شیکھر، ارون سنگھ اور مرکزی وزیر ہردیپ سنگھ پوری، ایس پی کے پروفیسر رام گوپال یادو، ڈاکٹر چندر پال سنگھ یادو اور روی پرکاش ورما، کانگریس کے پی ایل پنیا جبکہ بی ایس پی کے جاوید علی خان اور راجا رام کا میعاد کار 25 نومبر کو ختم ہو رہا ہے۔ وہیں اتراکھنڈ سے کانگریس کے رکن راجیہ سبھا راج ببر کی بھی میعاد کار 25 نومبر کو ہی ختم ہو رہی ہے۔
Follow us: Facebook, Twitter, Google News
قومی آواز اب ٹیلی گرام پر بھی دستیاب ہے۔ ہمارے چینل (qaumiawaz@) کو جوائن کرنے کے لئے یہاں کلک کریں اور تازہ ترین خبروں سے اپ ڈیٹ رہیں۔