وزیر اعظم نریندر مودی اپنا 56 انچ کا سینہ لے کر پریس کانفرنس کریں: راہل گاندھی 

نئی دہلی: کانگریس صدر راہل گاندھی نے وزیراعظم نریندر مودی پر پریس سے بات نہ کرنے کا الزام لگاتے ہوئے طنز کیا کہ انہیں اپنے 56 انچ کے سینے کے ساتھ پریس کانفرنس کرنی چاہیے۔

راہل گاندھی نے کہا کہ کانگریس صدر کے طور پر وہ مسلسل میڈیا سے بات کرتے رہتے ہیں اور ان کے ہر سوال کا جواب دیتے ہیں لیکن وزیراعظم پریس سے کبھی بات نہیں کرتے۔ انہوں نے پہلے بھی کئی بار یہ الزام عائد کیا ہے کہ مودی پریس کانفرنس میں صحافیوں کے سوالوں کے جواب دینے سے ڈرتے ہیں اس لئے وہ پریس سے بات نہیں کرتے۔

انہوں نے اتوار کو ٹوئٹ کیا کہ ’کل چھتیس گڑھ میں میں نے پریس کے ارکان سے بات چیت کی۔ اس بات چیت کی ایک چھوٹی سی ویڈیا دیکھیں۔ مجھے یقین ہے کہ ایک دن ہمارے وزیراعظم بھی (اپنے 56 انچ کے سینے کے ساتھ) پریس کانفرنس کریں گے‘۔

اس کے ساتھ ہی راہل گاندھی نے ایک ویڈیو بھی پوسٹ کیا جس میں وہ چھتیس گڑھ میں اپنے انتخابی پروگرام کے دوران صحافیوں سے بات چیت کر رہے ہیں اور ان کے ہر سوال کا جواب دے رہے ہیں۔