’لیلیٰ مجنوں‘ سے ’مُلک‘ تک، ’مسلم کرداروں‘ میں جان ڈال دیتے تھے رشی کپور

رشی کپور نے فلموں میں ویسے تو کئی طرح کے کردار نبھائے، لیکن جب بھی وہ کسی مسلم شخص کے کردار میں نظر آئے تو انہوں نے سب کا دل جیت لیا۔

تصویر سوشل میڈیا
تصویر سوشل میڈیا
user

قومی آوازبیورو

بالی ووڈ کو لگاتار دو دن میں دو بڑے دھچکے لگے ہیں۔ بدھ کے روز عرفان خان کے جانے کے بعد آج رشی کپور بھی دار فانی سے کوچ کر گئے۔ کپور خاندان کے چشم چراغ رشی کپور کے جانے سے بھی بالی ووڈ کو شدید دھچکا پہنچا ہے۔ ان کا شمار ان اداکاروں میں ہوتا تھا جنہیں ہیرو بھی کہا جاتا تھا، جو لوگوں کو اپنی طرف متوجہ کرتے تھے اور جس کردار کو بھی ادا کریں اس میں جان ڈال دیتے۔ رشی کپور نے فلموں میں ویسے تو کئی طرح کے کردار نبھائے، لیکن جب بھی وہ کسی مسلم شخص کے کردار میں نظر آئے تو انہوں نے سب کا دل جیت لیا۔

لیلیٰ مجنوں، امر اکبر انتھونی اور حال ہی میں ریلیز ہونے عالی ملک… یہ وہ فلمیں تھیں جنہوں نے تاریخ رقم کی۔ ان تمام کرداروں میں رشی کپور نے نہ صرف جان ڈال دی بلکہ لوگوں کے دلوں میں ان کہانیوں کے گہرے نقش چھوڑے۔

رشی کپور کی اداکاری والی کچھ فلمیں اور ان میں رشی کپور کے کردار کے نام جو ان کی مؤثر اداکاری کی گواہی دیتے ہیں:

  • لیلی مجنوں ۔ مجنوں / قیس
  • امر اکبر انتھونی ۔ اکبر الہ آباد
  • دیدارِ یار ۔ جاوید علی خان
  • یہ عشق نہیں آساں - سلیم احمد سلیمؔ
  • طوائف ۔ داؤد محمد علی خان یوسف زئی
  • نقاب ۔ عمران
  • ہتھیار - سمیع اللہ خان
  • عجوبہ - حسن
  • کچھ تو ہے - بخشی
  • تہذیب ۔ انور جمال
  • فنا- ذوالفقار
  • دہلی 6 ۔ علی بیگ
  • ٹیل می او خدا - الطاف زرداری
  • جب تک ہے جاں ۔ عمران
  • اگنی پتھ۔ رؤف لالہ
  • ڈی ڈے - اقبال سیٹھ
  • ملک - مراد علی محمد

رشی کپور کی پیدائش بالی ووڈ کے سب سے بڑے خاندان یعنی کپور خداندان میں 4 ستمبر 1952 کو ہوئی تھی۔ بدھ کے روز رشی کپور کو ممبئی کے ایک اسپتال میں آئی سی یو میں داخل کیا گیا تھا اور جمعرات کو وہ دنیا سے رخصت ہو گئے۔ رشی کپور کی عمر 67 سال تھی اور وہ کینسر جیسے موذی مرض میں مبتلا تھے۔

Published: 30 Apr 2020, 4:40 PM