محمد سراج 5 وکٹ لینے کے بعد ہوئے جذباتی، مرحوم والد کو کیا یاد

برسبین کے گابا میدان پر ہندوستان اور آسٹریلیا کے درمیان کھیلے جا رہے چوتھے ٹیسٹ میچ میں آسٹریلیا کی دوسری اننگ 294 رن پر سمٹ گئی اور اس میں اہم کردار ہندوستان کے تیز گیندباز محمد سراج کا رہا جنھوں نے 19.5 اوور میں محض 73 رن دے کر 5 وکٹ حاصل کیے۔ برسبین ٹیسٹ محمد سراج کا تیسرا ٹیسٹ ہے اور اتنی جلد ایک اننگ میں 5 وکٹ حاصل کرنے کا کارنامہ انجام دے کر محمد سراج جذباتی ہو گئے اور اپنے مرحوم والد کو یاد کیا جن کا گزشتہ دنوں انتقال ہو گیا تھا اور آسٹریلیا دورہ چھوڑ کر سراج وطن واپس نہیں لوٹ پائے۔

محمد سراج کی اس کارکردگی کو انتہائی اہم اس لیے بھی ٹھہرایا جا رہا ہے کیونکہ گزشتہ دو ٹیسٹ میچوں سے انھیں لگاتار آسٹریلیائی شائقین کی بدزبانی کا سامنا کرنا پڑ رہا ہے۔ اس کے باوجود محمد سراج نے اپنے کھیل کو متاثر نہیں ہونے دیا اور چوٹ سے نبرد آزما ہندوستانی ٹیم کو مضبوطی فراہم کی۔ یہی وجہ ہے کہ کئی سابق کرکٹرس بھی محمد سراج کی تعریف کرتے نہیں تھک رہے۔

یہاں قابل غور ہے کہ ہندوستان اور آسڑیلیا کے خلاف جاری بارڈر-گواسکر ٹیسٹ سیریز کے آخری اور فیصلہ کن میچ میں حیدرآبادی تیزگیند باز محمد سراج نے اپنی صلاحیتوں کا لوہا منواتے ہوئے آج جو پانچ وکٹیں حاصل کی ہیں، وہ اس لیے بھی انتہائی اہم ہیں کیونکہ اب تک صرف 4 ہندوستانی گیندباز ہی گابا میدان پر یہ کارنامہ انجام دے پائے ہیں۔ سراج سے پہلے گابا اسٹیڈیم پر ای اے ایس پرسنا، بشن سنگھ بیدی، مدن لال اور ظہیرخان نے پانچ وکٹیں حاصل کی تھیں۔

واضح رہے کہ محمد سراج کو ہندوستانی تیز گیند بازمحمد سمیع کے زخمی ہونے کے بعد ٹیم میں شامل کیا گیا تھا۔ محمد سراج نے سمیع کی کمی پوری کرنے کی ہر ممکن کوشش کی اور کافی حد تک اس میں انھیں کامیابی بھی ملی ہے۔ اس میچ میں ہندوستان کے کلیدی گیند باز جسپریت بُمراہ کی عدم موجودگی میں محمد سراج پر بھاری ذمہ داری تھی اور انہوں نے اس ذمہ داری کو بخوبی ادا کیا۔ انہوں نے آخری ٹیسٹ کے دوران بُمراہ کی کمی بھی محسوس ہونے نہیں دی۔

یہاں قابل غور یہ ہے کہ محمد سراج رواں بارڈر-گواسکر سیریز میں سب سے زیادہ وکٹیں لینے والے گیند باز بھی بن گئے ہیں۔سراج نے تین میچوں میں 13وکٹیں لی ہیں جو اشون سے ایک زیادہ ہے۔اشون پیٹھ میں انجری کی وجہ سے چوتھے ٹسٹ کیلئے دستیاب نہیں ہوسکے۔ سراج نے برسبین ٹسٹ میں دوسری اننگز میں فاسٹ بولنگ میں بہترین مظاہرہ کیا اور میرنس لمبشے،میتھو واڈے،اسٹیو اسمتھ،مچل اسٹارس اور جوش ہیزل ووڈ کو پولین بھجوایا۔

پانچ وکٹ لینے کے بعد جب محمد سراج ڈریسنگ روم کی طرف میدان سے جارہے تھے تو اس وقت ان کی ٹیم کے کھلاڑیوں نے ان کو اسٹینڈنگ اوویشن دیا۔ اس کا ویڈیو بی سی سی آئی نے اپنے ٹوئیٹر ہینڈل پر پوسٹ کیا ہے۔ اس13سیکنڈ کی مختصر ویڈیو میں یہ بھی دکھایاگیا ہے کہ محمد سراج کو ان کے ساتھ بُمراہ اس کارنامہ پرگلے لگارہے ہیں اور ان کے ساتھی اس کارنامہ پر مسرور ہوکر تالیاں بجا رہے ہیں۔