گجرات میں بھی موب لنچنگ، چوری کے شبہ میں ایک شخص کا پیٹ پیٹ کر قتل

پولس نے 23 ستمبر کو جام نگر میں ہوئی موب لنچنگ کی تفصیل میڈیا کے سامنے پیش کی۔ میدھ پور پولس تھانہ کے ایک افسر نے اس سلسلے میں بتایا کہ واقعہ موتی کھاوڑی گاؤں میں 22 ستمبر کو پیش آیا تھا۔

تصویر سوشل میڈیا
تصویر سوشل میڈیا
user

قومی آوازبیورو

ملک میں موب لنچنگ کے واقعات لگاتار بڑھ رہے ہیں۔ 22 ستمبر کو ہی جھارکھنڈ میں موب لنچنگ کا واقعہ پیش آیا تھا جو مختلف اخبارات کی سرخیاں بنیں، اور اب گجرات میں موب لنچنگ کی خبر سرخیاں بن رہی ہیں۔ میڈیا ذرائع کے مطابق گجرات کے جام نگر ضلع میں چوری کے شک میں ایک شخص کی سات لوگوں نے زبردست پٹائی کر دی۔ اس پٹائی کی وجہ سے نوجوان کی موت واقع ہو گئی۔

پولس نے 23 ستمبر کو جام نگر میں ہوئی موب لنچنگ کی تفصیل میڈیا کے سامنے پیش کی۔ میدھ پور پولس تھانہ کے ایک افسر نے اس سلسلے میں بتایا کہ واقعہ موتی کھاوڑی گاؤں میں 22 ستمبر کو پیش آیا تھا۔ اس معاملے میں تین ملزموں کو گرفتار بھی کیا گیا ہے۔ مہلوک شخص کے بارے میں بتایا جاتا ہے کہ وہ 35 سال کا تھا، لیکن فی الحال اس کی شناخت نہیں ہو پائی ہے۔

مہلوک شخص سے متعلق کچھ لوگوں کا کہنا ہے کہ وہ اتوار کی صبح دیوار پھاند کر کسی مکان کے اندر گھسنے کی کوشش کر رہا تھا۔ جب کچھ لوگوں نے اسے ایسا کرتے ہوئے دیکھا تو اسے پکڑ لیا اور پھر زبردست پٹائی شروع کر دی۔ پولس افسر کا کہنا ہے کہ چور ہونے کے شبہ کی وجہ سے لوگوں نے نوجوان کی لکڑی و پلاسٹک کی چھڑوں سے پٹائی کر دی۔ پٹائی اس قدر بے رحمی سے کی گئی تھی کہ جائے وقوع پر ہی نوجوان کی موت ہو گئی۔

پولس کا کہنا ہے کہ واقعہ کے تعلق سے مقدمہ درج کر لیا گیا ہے اور تین ملزمین کی گرفتاری بھی ہو گئی ہے۔ گرفتار ملزمین کے نام پربھاکر ترپاٹھی، یوگیش سنگھ اور منوج سنگھ بتائے جا رہے ہیں۔ پولس کے مطابق پربھاکر اور یوگیش اتر پردیش کے باشندے ہیں جب کہ منوج بہار کا رہنے والا ہے۔ دیگر ملازمین کی تلاش پولس کے ذریعہ کی جا رہی ہے۔

next