بہار اسمبلی انتخابات: ’بہار کو بلڈوزر نہیں چاہئے‘، میسا بھارتی کا یوگی آدتیہ ناتھ پر نشانہ

راشٹریہ جنتا دل (آر جے ڈی) کی لیڈر میسا بھارتی نے این ڈی اے اور بی جے پی پر سخت تنقید کرتے ہوئے پوچھا ہے کہ کیا بہار بی جے پی لیڈروں کا بحران ہے جو یوگی آدتیہ ناتھ جیسے لیڈروں سے تشہیر کرائی جا رہی ہے۔ انہوں نے دعویٰ کرتے ہوئے کہا کہ بہار میں اگلی حکومت مہاگٹھ بندھن بنانے جا رہا ہے اور اس کے سربراہ تیجسوی یادو ہوں گے۔

میڈیا سے بات کرتے ہوئے آر جے ڈی لیڈر میسا بھارتی نے کہا کہ بہار میں بدلاؤ طے ہے اور مہاگٹھ بندھن حکومت بنا رہا ہے کیونکہ ریاست کا نوجوان تبدیلی کا موڈ بنا چکا ہے اور اس لئے اگلی حکومت نوجوانوں کی بننے جا رہی ہے، جس کی قیادت تیجسوی یادو کریں گے۔ انہوں نے یہ بھی دعویٰ کیا کہ بہار کی تاریخ میں پہلی بار ایک ملاح کے بیٹے مکیش سہنی کو نائب وزیر اعلیٰ بننے کا موقع ملے گا۔

بہار اسمبلی انتخابات کے لیے اتر پردیش کے وزیر اعلیٰ یوگی آدتیہ ناتھ مسلسل انتخابی ریلیوں سے خطاب کر رہے ہیں۔ جب میڈیا نے اس بارے میں میسا بھارتی سے سوال کیا تو انہوں نے پوچھا کہ کیا بہار میں بی جے پی کو لیڈروں کے بحران کا سامنا ہے، جو وہ دوسری ریاستوں سے لوگوں اور وزرائے اعلیٰ کو بلانے پر مجبور ہے؟ میسا بھارتی نے یوگی آدتیہ ناتھ کو نشانہ بناتے ہوئے کہا کہ بہار کو بلڈوزر نہیں چاہئے، یوگی آدتیہ ناتھ کا بہار میں کوئی کردار نہیں ہے۔ انہیں اتر پردیش جا کر اپنا بلڈوزر چلانا چاہیے، بلڈوزر چلانے والے لیڈروں کو بہار میں داخل نہیں ہونے دیا جانا چاہئے۔

بہار اسمبلی انتخابات کے لیے این ڈی اے کے منشور کے بارے میں آر جے ڈی لیڈر میسا بھارتی نے کہا کہ 20 سال بعد انہیں یاد آیا ہے کہ بہار میں کے جی سے پی جی تک کی تعلیم مفت ہونی چاہیے۔ اتنے بچوں کا مستقبل برباد کرنے کے بعد ، بہار کے عوام اس بار بی جے پی اور این ڈی اے لیڈروں کو معاف کرنے والے ہیں۔

 میسا بھارتی نے کہا کہ بہار کے لوگ اب این ڈی اے کے جھوٹے پروپیگنڈے میں نہیں آنے والے ہیں۔ اس بار تیجسوی یادو کی قیادت میں مہا گٹھ بندھن کی حکومت بننے والی ہے۔ وہ 20 سال میں ترقی نہیں کرپائے اور اب بہار کے لوگ انہیں مزید پانچ سال نہیں دینے والے ہیں۔ آر جے ڈی لیڈر نے کہا کہ تیجسوی کی قیادت والی حکومت بہار کو آگے لے جانے کے لیے کام کرے گی۔