’دَم ہے تو تاج محل اور لال قلعہ کو مندر بنا کر دکھائیں‘، بی جے پی کو محبوبہ مفتی کا چیلنج

گیان واپی مسجد کے بعد تاج محل کے سروے کا مطالبہ بھی ہندوتوا بریگیڈ کی طرف سے زور پکڑ رہا ہے۔ تاج محل کے 22 بند کمروں کو کھولنے کے لیے ایک عرضی بھی عدالت میں داخل کر دی گئی ہے۔ اس درمیان جموں و کشمیر کی سابق وزیر اعلیٰ اور پی ڈی پی چیئرمین محبوبہ مفتی نے ملک کے موجودہ ماحول پر ناراضگی ظاہر کرتے ہوئے بی جے پی کو سخت تنقید کا نشانہ بنایا ہے۔ انھوں نے اپنے ایک بیان میں کہا ہے کہ ’’اگر دم ہے تو تاج محل اور لال قلعہ کو مندر بنا کر دکھائیں۔ پھر دیکھتے ہیں کتنے لوگ ہندوستان میں انھیں دیکھنے آئیں گے۔‘‘

محبوبہ مفتی نے کہا کہ یہ بدقسمتی ہے کہ بی جے پی لوگوں کو ملازمتیں نہیں دلا پا رہی ہے، مہنگائی پر قابو نہیں کر پا رہی ہے، اور ملک کی ملکیت کو لگاتار فروخت کر رہی ہے۔ انھوں نے مزید کہا کہ ہمارا ملک آج بنگلہ دیش، پاکستان اور نیپال سے بھی پیچھے جا چکا ہے۔ لیکن ان لوگوں کو اس بات کی کوئی فکر نہیں ہے۔ محبوبہ مفتی کا کہنا ہے کہ ’’لوگوں کو مسلمانوں کے پیچھے لگایا جا رہا ہے۔ اس میں مسجدوں سے لے کر تاج محل تک شامل ہے۔ ملک کا پیسہ لوٹ کر بھاگنے والوں کو واپس لانے کی جگہ یہ لوگ مغل دور میں بنائی گئی ملکیتوں کو تباہ کرنا چاہتے ہیں۔‘‘