پی ایم مودی، کانگریس صدر کھڑگے اور راہل گاندھی سمیت کئی سرکردہ رہنماؤں کا صحافی پایل مہتا کے انتقال پر اظہار تعزیت
کھڑگے نے ’ایکس‘ پر لکھا کہ ’’پایل مہتا جی کے انتقال سے گہرا دکھ ہوا ہے۔ وہ ایک محنتی اور لگن سے کام کرنے والی صحافی تھیں، جنہوں نے پارلیمنٹ کی کوریج کی اور عوامی امور کی گہری سمجھ رکھتی تھیں۔‘‘
وزیر اعظم نریندر مودی، وزیر داخلہ امت شاہ، کانگریس کے قومی صدر ملکارجن کھڑگے اور لوک سبھا میں حزب اختلاف کے قائد راہل گاندھی سمیت کئی سرکردہ سیاسی رہنماؤں نے سینئر صحافی پائل مہتا کے انتقال پر تعزیت کا اظہار کیا ہے۔ وزیر اعظم نریندر مودی نے ’ایکس‘ پر لکھا کہ ’’پایل مہتا جی ایک محنتی صحافی تھیں، جو ہمیشہ زمین سے مضبوطی سے جڑی رہیں اور اپنی رپورٹنگ میں قومی مسائل کی گہری سمجھ پیش کی۔ اپنے کام کے علاوہ، انہیں ان کی مہربانی اور گرمجوشی کے لیے بھی یاد کیا جائے گا، جس کے ذریعے انہوں نے بہت سے لوگوں کی زندگیوں کو متاثر کیا۔ ان کا اچانک اور بے وقت انتقال انتہائی افسوسناک ہے۔ ان کے خاندان، دوستوں اور ساتھیوں سے میری دلی تعزیت۔ دعا ہے کہ وہ اس مشکل گھڑی میں حوصلہ رکھ سکیں۔ اوم شانتی۔‘‘
وزیر داخلہ امت شاہ نے ’ایکس‘ پر لکھا کہ ’’سینئر صحافی پایل مہتا جی کے انتقال سے گہرا دکھ ہوا ہے۔ وہ ایک مکمل پیشہ ور تھیں، جو کسی بھی معاملے سے متعلق ہر تفصیل اپنے قارئین اور ناظرین تک پہنچانے کے لیے پرعزم رہتی تھیں اور ایک گرمجوش شخصیت کی مالک تھیں۔ ایسی باصلاحیت اور محنتی صحافی کا بے وقت انتقال صحافت کے شعبے کے لیے ناقابل تلافی نقصان ہے۔ میں ان کے سوگوار خاندان اور دوستوں سے دلی تعزیت کا اظہار کرتا ہوں اور ایشور سے دعا گو ہوں کہ وہ انہیں اس گہرے دکھ کو برداشت کرنے کی طاقت دے۔ اوم شانتی۔‘‘
کانگریس کے قومی صدر ملکارجن کھڑگے ’ایکس‘ پر لکھتے ہیں کہ ’’پایل مہتا جی کے انتقال سے گہرا دکھ ہوا ہے۔ وہ ایک محنتی اور لگن سے کام کرنے والی صحافی تھیں، جنہوں نے پارلیمنٹ کی کوریج کی اور عوامی امور کی گہری سمجھ رکھتی تھیں۔ ان کا بے وقت انتقال انتہائی افسوسناک ہے۔ ان کے خاندان، دوستوں اور ساتھیوں سے میری دلی تعزیت۔ دعا ہے کہ وہ اس مشکل گھڑی میں حوصلہ رکھ سکیں۔‘‘ لوک سبھا میں حزب اختلاف کے قائد راہل گاندھی نے ’ایکس‘ پر لکھا کہ ’’پارلیمنٹ کی کوریج کرنے والی صحافی پایل مہتا جی کے بے وقت انتقال سے دکھ ہوا ہے۔ ان کے خاندان، دوستوں اور ساتھیوں سے میری دلی تعزیت۔‘‘
قابل ذکر ہے کہ ملک کی معروف سینئر صحافی پایل مہتا کا انتقال ممبئی میں ہوا۔ ان کے قریبی ساتھیوں کے مطابق ہفتہ کی دیر رات مہتا نے بے چینی محسوس کی، جس کے بعد انہیں رات تقریباً 2 بجے اسپتال لے جایا گیا۔ حالانکہ علاج شروع ہونے سے قبل ہی ڈاکٹروں کو ان کی نبض نہیں ملی اور انہیں مردہ قرار دے دیا گیا۔ پایل مہتا کو سیاسی صحافت کے میدان کی ماہر صحافی مانا جاتا تھا۔
قومی آواز اب ٹیلی گرام پر بھی دستیاب ہے۔ ہمارے چینل (qaumiawaz@) کو جوائن کرنے کے لئے یہاں کلک کریں اور تازہ ترین خبروں سے اپ ڈیٹ رہیں۔