ڈیٹنگ ایپس پر فرضی شناخت بنا کر خواتین کو نشانہ بنانے والا ملزم گرفتار، دو کروڑ کی ٹھگی کا انکشاف

نئی دہلی: دہلی کے جنوب مغربی ضلع کی پولیس نے ڈیٹنگ ایپس اور سوشل میڈیا پلیٹ فارمز پر فرضی شناخت کے ذریعے خواتین کو نشانہ بنانے والے ایک ملزم کو گرفتار کر لیا ہے، جس پر بڑے پیمانے پر ٹھگی، بلیک میلنگ اور جبری وصولی کے سنگین الزامات عائد ہیں۔

پولیس کے مطابق گرفتار ملزم کی شناخت پون کمار (35) کے طور پر ہوئی ہے، جو مغربی بنگال کے ضلع شمالی 24 پرگنہ کا رہنے والا ہے۔ تفتیش میں یہ بات سامنے آئی کہ ملزم مختلف ڈیٹنگ اور شادی بیاہ سے متعلق ایپس پر جعلی پروفائل بنا کر خواتین سے رابطہ قائم کرتا تھا اور خود کو ایک باوقار اور خوشحال شخص کے طور پر پیش کرتا تھا۔

اعتماد حاصل کرنے کے بعد وہ متاثرہ خواتین کو سوشل میڈیا پلیٹ فارمز، خاص طور پر انسٹاگرام اور بعد ازاں واٹس ایپ پر منتقل کر لیتا تھا، جہاں وہ مسلسل رابطے میں رہ کر ایک جذباتی تعلق قائم کرتا اور پھر انہیں اپنے جال میں پھنساتا تھا۔

پولیس کا کہنا ہے کہ ملزم نے محبت، شادی، طبی ایمرجنسی، ماڈلنگ کے مواقع اور معروف اداروں میں پرویش دلانے جیسے مختلف بہانوں کے ذریعے خواتین سے رقم حاصل کی۔ کئی معاملات میں اس نے ہنی ٹریپ اور رومانس اسکیم کا سہارا لے کر متاثرین کو نہ صرف دھوکہ دیا بلکہ بلیک میل بھی کیا۔ اب تک کی جانچ میں 500 سے زائد خواتین سے تقریباً دو کروڑ روپے کی ٹھگی اور جبری وصولی کا انکشاف ہوا ہے۔

یہ معاملہ اس وقت سامنے آیا جب ایک متاثرہ خاتون نے ای ایف آئی آر درج کرائی۔ شکایت کے مطابق ‘ویبھव اروڑا’ کے نام سے چلائے جا رہے ایک جعلی انسٹاگرام اکاؤنٹ کے ذریعے اس سے تقریباً سات لاکھ روپے حاصل کیے گئے۔ خاتون نے بتایا کہ اس کی پہلی ملاقات ملزم سے ایک ڈیٹنگ ایپ پر ہوئی تھی، جہاں اس نے خود کو ایک ذمہ دار اور قابل اعتماد شخص ظاہر کیا تھا۔

پولیس کے مطابق ملزم نے ‘آنند’ نام سے ایک اور فرضی شناخت بھی بنائی اور خود کو اپنے ہی قریبی دوست کے طور پر پیش کرتے ہوئے شادی کے لیے خاندان سے ملاقات کروانے کا جھانسہ دیا۔ اس دوران اس نے مختلف بہانوں سے متاثرہ خاتون سے رقم طلب کی، جس پر اس نے اعتماد کرتے ہوئے لاکھوں روپے منتقل کر دیے۔

جب متاثرہ خاتون نے اپنی رقم واپس مانگی تو ملزم نے اچانک رابطہ ختم کر دیا۔ بعد میں واٹس ایپ پیغامات کے ذریعے یہ جھوٹا دعویٰ کیا گیا کہ ’ویبھو‘ نامی شخص کی موت ہو چکی ہے، تاکہ ہمیشہ کے لیے تعلق ختم کیا جا سکے اور گرفتاری سے بچا جا سکے۔

پولیس نے تکنیکی نگرانی، مشتبہ موبائل نمبروں کی ٹریکنگ اور سوشل میڈیا اکاؤنٹس کے تجزیے کے ذریعے ملزم تک رسائی حاصل کی۔ تحقیقات کے دوران دو موبائل نمبر مغربی بنگال کے 24 پرگنہ علاقے میں سرگرم پائے گئے، جس کے بعد پولیس ٹیموں نے وہاں چھاپہ مار کارروائی کی اور جال بچھا کر ملزم کو گرفتار کر لیا۔

ملزم کے قبضے سے چار اسمارٹ فون، آٹھ سم کارڈ، تین ڈیبٹ کارڈ، سونے کے چار کنگن اور پانچ سونے کی چین برآمد کی گئی ہیں، جو مبینہ طور پر ٹھگی کی رقم سے خریدی گئی تھیں۔ پولیس کے مطابق ملزم اس سے قبل بھی اسی نوعیت کے دو مقدمات میں ملوث رہ چکا ہے، جبکہ اس کے خلاف مزید تحقیقات جاری ہیں۔