ممتا بنرجی نندی گرام سے جیت رہی ہیں، وزیر اعظم مودی بنارس کی فکر کریں! ٹی ایم سی

کولکاتا: ترنمول کانگریس نے واضح کر دیا ہے کہ ممتا بنرجی کو نندی گرام میں جیت کا پورا بھروسہ ہے، لہذا وہ دوسری کسی اور سیٹ سے انتخاب نہیں لڑیں گی۔

خیال رہے کہ گزشتہ روز وزیر اعظم نریندر مودی نے طنز کرتے ہوئے کہا تھا کہ چونکہ ممتا بنرجی نندی گرام سے انتخاب ہار رہی ہیں اس لئے انہیں کسی اور محفوظ سیٹ سے انتخاب لڑنا چاہیے۔ اس کے جواب میں ترنمول کانگریس نے کہا ہے کہ انہیں ممتا بنرجی کی فکر کرنے کے بجائے اپنی فکر کرنی چاہیے، انہیں بنارس میں براہ راست چیلنج دیا جائے گا۔

گرچہ ترنمول کانگریس نے واضح نہیں کیا ہے کہ ممتا بنرجی 2024 میں بنارس سے لوک سبھا انتخاب لڑیں گی یا نہیں مگر قیاس آرائی شروع ہوگئی ہے۔

ترنمول کانگریس نے اپنے آفیشل پیج سے ٹوئیٹ کرتے ہوئے لکھا “دیدی نندی گرام سے جیت رہی ہیں۔ اس لئے کسی بھی دوسری سیٹ سے ان کے انتخاب لڑنے کا سوال ہی پیدا نہیں ہوتا۔‘‘

ٹی ایم سی نے وزیر اعظم نریندر مودی کو مخاطب کر کے ایک اور ٹوئیٹ میں لکھا "وزیر اعظم بنگال کے عوام کو گمراہ کرنا چھوڑ دیں، آپ کا جھوٹ کھل کر سامنے آچکا ہے۔ 2024 میں اپنے لئے ایک محفوظ نشست تلاش کریں۔ کیونکہ، آپ کو وارانسی میں سخت مقابلہ کا سامنا کرنا پڑے گا۔‘‘

دوسری جانب بی جے پی نے کہا کہ اگر ممتا بنرجی بنارس سے انتخاب لڑنا چاہتی ہیں تو ان کا خیر مقدم ہے۔ خیال رہے کہ حال ہی میں ممتا بنرجی نے سیکولر جماعتوَں کے لیڈروں کو خط لکھ کر کہا تھا کہ ملک کے جمہوری ڈھانچے کی حفاظت کے لئے متحد ہو جائیں۔