تیل کی بڑھتی قیمتوں سے ناراض ممتا بنرجی الیکٹرانک اسکوٹی سے پہنچیں سکریٹریٹ

بنگال کی وزیرا علیٰ ممتا بنرجی نے نامہ نگاروں سے بات کرتے ہوئے کہا کہ مرکزی حکومت نے عوام کی ضروریات سے منھ موڑلیا ہے اور پٹرولیم کی مصنوعات کی قیمتوں میں اضافے کی وجہ سے مہنگائی آسمان پر پہنچ چکی ہے

ممتا بنرجی، تصویر آئی اے این ایس
ممتا بنرجی، تصویر آئی اے این ایس
user

یو این آئی

کولکاتا: ترنمول کانگریس اور بی جے پی کے درمیان جاری کشمکس اور سیاسی بیان بازی کے دوران پٹرولیم مصنوعات کی قیمتوں میں اضافے کے خلاف احتجاج کرنے کے لئے وزیرا علیٰ ممتا بنرجی بذات خود سڑک پر اتریں اور ریاستی سیکریٹریٹ الیکٹرنک اسکوٹی کےذریعہ پہنچیں۔

ریاستی سیکریٹریٹ پہنچنے کے بعد وزیرا علیٰ ممتا بنرجی نے نامہ نگاروں سے بات کرتے ہوئے کہا کہ مرکزی حکومت نے عوام کی ضروریات سے منھ موڑ لیا ہے اور پٹرولیم کی مصنوعات کی قیمتوں میں اضافے کی وجہ سے مہنگائی آسمان پر پہنچ چکی ہے اور سماج کا ہر ایک طبقہ پریشان ہے۔ ممتا بنرجی کی بائیک ریاستی وزیر فرہاد حکیم چلا رہے تھے اور ممتا بنرجی پیچھے بیٹھی ہوئی تھیں اور ان کے ہاتھ میں بینر میں تھے۔ ممتا بنرجی سمیت قافلے میں شریک تمام افراد ٹریفک اصول پر عمل کرتے ہوئے ہیلمٹ پہن رکھے تھے۔


وزیر اعلیٰ ممتا بنرجی نے کہا کہ ترنمول کانگریس کے کارکنان ریاست بھر میں پٹرولیم مصنوعات کی قیمتوں میں اضافے کے خلاف کل احتجاج کریں گے۔ ممتا بنرجی نے ملک بھر کی اپوزیشن جماعتوں سے اپیل کی وہ پٹرولیم مصنوعات کی قیمتوں میں اضافے کے خلاف سڑکوں پر اتر کر احتجاج کریں۔

ممتا نے گجرات کے دنیا کے سب سے بڑے کرکٹ اسٹیڈیم موٹیرا اسٹیڈیم کا نام نریندر مودی اسٹیڈیم تبدیل کرنے پرتنقید کرتے ہوئے کہا کہ شاید کسی دن وہ ملک کا نام بھی تبدیل کردیں گے۔ اس کے علاوہ انہوں نے سرکاری اداروں کی نجکاری کے لئے مرکز ی حکومت کی تنقید کرتے ہوئے کہا کہ ملک کے سرمایے کو چند لوگوں کے ہاتھوں میں دینے کی کوشش کی جا رہی ہے۔


ممتا نے کہا کہ ایل پی جی کی قیمتوں میں مسلسل اضافہ ہو رہا ہے۔ اس وقت 800 روپے فی سلنڈر مل رہا ہے، سبسڈی ختم کردی گئی۔ جبکہ بی جے پی کے لیڈران فائیو اسٹار ہوٹل میں بیٹھ کر بڑی بڑی باتیں کرتے ہیں مگر انتخابات ختم ہوتے ہی وہ عوام کو چھوڑ دیتے ہیں۔ بی جے پی غبارہ کے علاوہ کچھ بھی نہیں ہے۔ اس درمیان ریاستی حکومت نے پٹرولیم کی مصنوعات پر ایک روپے ٹیکس کم کرکے ریاست کے عوام کو راحت پہنچانے کی کوشش کی ہے۔ ممتا بنرجی نے کہا کہ ریاست کے پاس آمدنی کے ذرائع کم ہیں۔ ہم اپنی طرف مہنگائی کرنے کی بھر پور کوشش کرتے ہیں مگر مرکزی حکومت کے پاس مہنگائی کو کم کرنے کے عزائم نہیں ہیں۔

قومی آواز اب ٹیلی گرام پر بھی دستیاب ہے۔ ہمارے چینل (qaumiawaz@) کو جوائن کرنے کے لئے یہاں کلک کریں اور تازہ ترین خبروں سے اپ ڈیٹ رہیں۔