ممتا بنرجی کا امت شاہ پر حملہ، انتخابی کمیشن کے امور میں مداخلت کرنے کا الزام

نئی دہلی: اسمبلی انتخابات کے پیش نظر مغربی بنگال کی سیاست میں لگاتار ہلچل نظر آ رہی ہے اور وزیر اعلیٰ ممتا بنرجی بھی زخمی ہونے کے بعد دوبارہ فعال ہو گئی ہیں۔ اتوار کے بعد سے وہ روڈ شو اور ریلیاں کر رہی ہیں۔ منگل کے روز انہوں نے مرکزی وزیر امت شاہ پر حملہ بولا۔ انہوں نے الزام عائد کیا کہ وزیر داخلہ امت شاہ الیکشن کمیشن کے کاموں میں دخل دے رہے ہیں اور امور کو متاثر کرنے کی کوشش کر رہے ہیں۔

انتخابی ریلی سے خطاب کے دوران ممتا بنرجی نے کہا، ’’کیا وزیر دخلہ ملک کو چلائیں گے یا طے کریں گے کہ کون گرفتار ہوگا اور کون پیٹا جائے گا؟ یا پھر وہ یہ طے کریں گے کہ کون سی ایجنسی کس کا تعاقب کرے گی؟ الیکشن کمیشن چلا کون رہا ہے؟ امید کرتی ہوں کہ امت شاہ یہ آپ نہیں ہیں، ہم آزادانہ اور غیر جانب دارانہ انتخابات چاہتے ہیں۔ وہ الیکشن کمیشن کے روزانہ کے امور میں مداخلت کر رہے ہیں۔‘‘

خیال رہے کہ ممتا بنرجی گزشتہ ہفتہ نندی گرام میں پرچہ نامزدگی داخل کرنے کے بعد اپنی کار میں لوگوں کا استقبال کرنے کے دوران زخمی ہو گئی تھیں۔ انہوں نے الزام عائد کیا کہ ان کو کچھ لوگوں نے دھکا دیا تھا، تاہم یہ معاملہ انتخابی کمیشن کے سامنے پہنچا۔ انتخابی کمیشن نے ایک میٹنگ کی اور ریاست سے ملی رپورٹ کی بنیاد پر کہا ہے کہ ممتا بنرجی کے ساتھ حادثہ ہوا تھا، نہ کہ ان پر حملہ ہوا تھا۔

امت شاہ نے ممتا کی لگی چوٹ پر بیان جاری کرتے ہوئے بنگال میں بی جے پی کارکنان کی موت کا مسئلہ اٹھایا تھا۔ انہوں نے کہا تھا کہ ریاست میں ہو رہے تشدد میں جن بی جے پی کارکنان کی جان گئی، اس کا کیا ہوگا؟

ترنمول کانگریس کے لیڈر نے بھی گزشتہ ہفتہ چیف الیکٹرورل آفیسر سے ملاقات کر کے معاملہ کی جانچ کرنے کا مطالبہ کیا تھا۔ بی جے پی نے کہا تھا کہ اس معاملہ کی جانچ کی جانی چاہیے۔ تاہم الیکشن کمیشن کے یہ نتیجہ اخذ کرنے کے بعد بنگال بی جے پی کے لیڈران نے اپیل کی ہے کہ وہ ممتا بنرجی کی میڈیکل رپورٹ کو عوامی کیا جائے۔