دہلی کے موجودہ حالات پر ممتا بنرجی نے ’جہنم‘ کے عنوان سے لکھی نظم

وزیر اعلیٰ ممتا بنرجی نے اپنی نظم کے آخری حصہ میں لکھا ہے کہ اس کا حل کیا ہے اور اس خون خرابے کا جواب کون دے گا۔ اس سے قبل ممتا بنرجی نے ایک نظم ”فرقہ پرستی قبول نہیں ہے“ کے عنوان سے لکھی تھی۔

تصویر سوشل میڈیا
تصویر سوشل میڈیا
user

یو این آئی

کولکاتا: وزیرا علیٰ ممتا بنرجی نے دہلی میں حالیہ تشدد کے واقعات پر ’جہنم‘ کے عنوان سے ایک نظم اپنے فیس بک پر پوسٹ کی ہے جس میں وزیر اعلیٰ ممتا بنرجی نے تشدد کے واقعات میں اموات پر صدمے کا اظہار کرتے ہوئے لکھا ہے کہ ”ہولی سے قبل خون کی ہولی کھیلی جا رہی ہے“۔

وزیر اعلیٰ ممتا بنرجی نے اس نظم کو تین زبانوں ہندی، بنگلہ اور انگریزی میں پوسٹ کیا ہے۔ کل وزیر اعلیٰ بھونیشور روانہ ہونے سے قبل کہا تھا کہ دہلی میں جو کچھ ہو رہا ہے وہ افسوسناک ہے۔ وزیر اعلیٰ نے سوال بھی کیا تھا کہ آخر کون لوگ خون کی ہولی کھیل رہے ہیں۔


وزیر اعلیٰ ممتا بنرجی نے اپنی نظم میں لکھا ہے ’’کہاں ہیں ہم، کس طرف جارہے ہیں، جنت میں جانے کے بجائے جہنم کا رخ کیوں کر لیا ہے۔ آخر یہ کون لوگ ہیں، کیوں لوگوں کے خون سے ہولی کھیلی جا رہی ہے۔ اب کتنے لوگ مریں گے اور اس کا جواب کون دے گا۔‘‘

وزیرا علیٰ ممتا بنرجی پہلے بھی متعدد مرتبہ اپنی نظموں کے ذریعہ حالات حاضرہ پر تبصرہ کرتی رہی ہیں۔ وزیر اعلیٰ کی نظموں کی کتاب بنگلہ کے علاوہ ہندی اور انگریزی میں شائع ہوچکی ہے۔ بنگال میں تشدد کے واقعات بی جے پی لیڈر ممتا حکومت کو گھیرنے کی کوشش کرتے ہوئے الزام لگاتے ہیں کہ بنگال میں جمہوریت نام کی کوئی چیز نہیں ہے۔ وزیر اعلیٰ ممتا بنرجی نے کسی بھی سیاسی جماعت پر تبصرہ کرنے سے گریز کرتے ہوئے اشاروں میں حکومت کی سخت تنقید کی ہے۔


وزیر اعلیٰ ممتا بنرجی نے اپنی نظم کے آخری حصہ میں لکھا ہے کہ اس کا حل کیا ہے اور اس خون خرابے کا جواب کون دے گا۔ اس سے قبل وزیرا علیٰ ممتا بنرجی نے لوک سبھا انتخابات میں ترنمول کانگریس کی شکست پر ایک نظم ”فرقہ پرستی قبول نہیں ہے“ کے عنوان سے لکھی تھی۔

تاہم بی جے پی لیڈروں نے وزیر اعلیٰ ممتا بنرجی کے ذریعہ تحریر نظم پر تبصرہ کرتے ہوئے لکھا ہے کہ ممتا بنرجی کو اس وقت تکلیف کیوں نہیں ہوئی تھی جب بشیر ہاٹ میں فرقہ وارانہ فسادات ہوئے تھے۔

Follow us: Facebook, Twitter, Google News

قومی آواز اب ٹیلی گرام پر بھی دستیاب ہے۔ ہمارے چینل (qaumiawaz@) کو جوائن کرنے کے لئے یہاں کلک کریں اور تازہ ترین خبروں سے اپ ڈیٹ رہیں۔