’فروری میں ہوگا لوک سبھا انتخاب!‘ ممتا بنرجی کی پیشین گوئی

مغربی بنگال کی وزیر اعلیٰ ممتا بنرجی نے آج جلپائی گوڑی میں ایک جلسہ سے خطاب کرتے ہوئے مرکزی حکومت اور وزیر اعظم نریندر مودی کو شدید تنقید کا نشانہ بنایا۔ ساتھ ہی انھوں نے پیشین گوئی کی کہ بی جے پی کی عمر اب صرف 6 ماہ رہ گئی ہے، کیونکہ فروری ماہ میں لوک سبھا انتخاب کرائے جائیں گے۔ ممتا بنرجی نے 2024 میں مودی حکومت کر اقتدار سے بے دخل کرنے کا عزم بھی ظاہر کیا۔

مغربی بنگال کی وزیر اعلیٰ نے ملک اور ریاست کے موجودہ حالات کا بھی تذکرہ کیا۔ انھوں نے بی ایس ایف سے غیر جانبدار ہو کر کام کرنے کی اپیل کی اور کہا کہ سبھی بی ایس ایف خراب نہیں ہوتے ہیں۔ ممتا نے کہا کہ ’’مودی آج ہیں اور کل چلے جائیں گے، یہ سمجھنا ہوگا۔ آج کوچ بہار میں بنگلہ دیش بارڈر سے آ کر گولی مار کر کوئی چلا گیا ہے۔ ہم لوگ کارروائی کر رہے ہیں۔‘‘

ممتا بنرجی نے یہ بیانات جلپائی گوڑی میں پنچایت انتخاب کے پیش نظر منعقد جلسہ سے خطاب کرتے ہوئے دیا۔ انھوں نے کہا کہ ’’ہم کسانوں کو ہر سال 10 ہزار روپے دے رہے ہیں اور کسانوں کی موت ہونے پر ان کے اہل خانہ کو 2 لاکھ روپے دیئے جا رہے ہیں۔‘‘ انھوں نے مزید کہا کہ ’’ترنمول کانگریس پنچایت انتخاب جیتے گی، اسمبلی انتخاب جیتے گی، اور لوک سبھا انتخاب جیتے گی۔ ترنمول کانگریس پوری ریاست میں آگے ہے، اسے کوئی نہیں ہرا سکتا۔‘‘

ممتا بنرجی نے مودی حکومت پر حملہ کرتے ہوئے کہا کہ لوک سبھا انتخاب سے پہلے بی جے پی نے کہا تھا کہ جیتنے پر چائے باغان کھول دیں گے، لیکن ایک بھی چائے باغان انھوں نے نہیں کھولا۔ جو بھی چائے باغان کھولے گئے ہیں وہ ریاست کی ترنمول کانگریس حکومت کے ذریعہ کھولے گئے۔ چائے باغان کو لے کر اپنے منصوبوں کا تذکرہ کرتے ہوئے وزیر اعلیٰ نے کہا کہ مزدوروں کو چائے باغان کا پٹہ دیا جائے گا اور اس کے لیے کام شروع ہو گیا ہے۔