کشمیر: اسلامک یونیورسٹی کا پہلا جلسہ تقسیم اسناد، سات ہزار طلبہ کو ڈگریاں تفویض

ایل جی منوج سنہا نے کہا کہ مصنوعی ذہانت اور جامع تعلیم کے ساتھ نئی پود کامیابی سے تمام چیلنجوں کا مقابلہ کر سکتی ہے۔

فائل تصویر آئی اےاین ایس
فائل تصویر آئی اےاین ایس
user

یو این آئی

لیفٹیننٹ گورنر منوج سنہا نے تعلیمی اداروں میں ٹھوس نتائج پر مبنی تعلیم فراہم کرنے پر زور دیا تاکہ دستیاب انسانی وسائل اور صنعتی ضروریات کے مابین خلا کو پُر کیا جاسکے۔لیفٹیننٹ گورنر پیر کے روز اسلامک یونیورسٹی برائے سائنس و ٹیکنالوجی اونتی پورہ کے پہلے کانووکیشن سے خطاب کر رہے تھے۔

کانووکیشن کے دوران 7000 اہل طلباء بشمول 163 گولڈ میڈلسٹ کو ڈگریوں سے نوازا گیا۔ اس کے علاوہ 14 اسکالروں کو ڈاکٹریٹ اور ایم فل کی ڈگریاں دی گئیں۔


اپنے خیالات کا اظہار کرتے ہوئے لیفٹیننٹ گورنر جو کہ یونیورسٹی کے چانسلر بھی ہیں نے کامیاب طالب علموں اور گولڈ میڈلسٹ کو ان کی تعلیمی کارکردگی کے لئے مبارک باد پیش کی اور فیکلٹی ممبران کو نوجوانوں کے اذہان کو بہتر سمت دینے کے لئے سراہا۔

انہوں نے کامیاب امیدواروں کے والدین اور اہل خانہ کے تئیں بھی نیک خواہشات کا اظہار کیا۔لیفٹیننٹ گورنر نے کہا کہ حکومت تعلیمی شعبے پر توجہ مرکوز کر رہی ہے۔انہوں نے کہا کہ جموں و کشمیر کے طلباء کافی باصلاحیت ہیں جو اعلیٰ تعلیمی اداروں میں داخلہ حاصل کرنےکی خواہش رکھتے ہیں۔


صنعتی شعبے میں انقلاب کے بارے میں بات کرتے ہوئے لیفٹیننٹ گورنر نے مشاہدہ کیا کہ چوتھے صنعتی انقلاب (صنعت 4.0) میں تکنیکی تبدیلی کا پیمانہ اور دائرہ کار بے مثال ہوگا اور مصنوعی ذہانت، روبوٹکس، انٹرنیٹ آف تھنگس، آٹو وہیکلز، تھری ڈی پرنٹنگ، نینو ٹیکنالوجی، بائیوٹیکنالوجی، مواد سائنس، انرجی سٹوریج، کوانٹم کمپیوٹنگ بہت سی ملازمتوں اور خود روزگار کے امکانات کو پیدا کرے گی۔ انہوں نے کہا کہ مصنوعی ذہانت اور جامع تعلیم کے ساتھ نئی پود کامیابی سے تمام چیلنجوں کا مقابلہ کر سکتی ہے۔

لیفٹیننٹ گورنر نے وائس چانسلر، ایگزیکٹو اور اکیڈمک کونسل کے ممبران، فیکلٹی اور عملے کو بہت ہی مختصر عرصے میں جموں کشمیر اور ملک میں ایک اعلیٰ سائنس اور ٹیکنالوجی یونیورسٹی کے طور پر آئی یو ایس ٹی کے لئے ایک بہت بڑی شہرت حاصل کرنے پر مبارک باد دی۔


لیفٹیننٹ گورنر نے والدین پر زور دیا کہ وہ اپنے بچوں میں ایک خصوصی اور مضبوط شخصیت پیدا کریں۔انہوں نے اساتذہ پر بھی زور دیا کہ وہ طلبا ءمیں ہم آہنگی برقرار رکھیں اور نئی پود کو بنیادی حقوق کے ساتھ ساتھ اپنے فرائض سے آگاہ کریں۔

اس موقعہ پر یونیورسٹی گرانٹ کمیشن (یو جی سی) کے چیئرمین پروفیسر ڈی پی سنگھ نے بھی کانووکیشن سے خطاب کیا اور ڈگری حاصل کرنے والے آئی یو ایس ٹی کے طلاب کو مبارک باد پیش کی۔اس سے قبل وائس چانسلر آئی یو ایس ٹی پروفیسر مشتاق اے صدیقی نے یونیورسٹی کی ماضی کی کامیابیوں اور مستقبل کے عملی منصوبوں پر روشنی ڈالتے ہوئے ایک رپورٹ پیش کی۔


انہوں نے کہا کہ یونیورسٹی طلبا میں تنقیدی ذہانت کی نشوونما ایک بہترین مرکز بننے کے لئے پوری کوشش کر رہی ہے۔انہوں نے مزید کہا کہ یونیورسٹی کا مقصد طلباء کی شخصیت کی تشکیل اور ان میں معاشرے کے تعمیری فرد کی حیثیت سے ذمہ داری کا احساس پیدا کرنا ہے۔

Follow us: Facebook, Twitter, Google News

قومی آواز اب ٹیلی گرام پر بھی دستیاب ہے۔ ہمارے چینل (qaumiawaz@) کو جوائن کرنے کے لئے یہاں کلک کریں اور تازہ ترین خبروں سے اپ ڈیٹ رہیں۔


Published: 02 Mar 2021, 7:40 AM