اہم خبریں: حکومت ہر حربہ اختیار کر کے جمہوریت کا قتل کر رہی ہے، اکھلیش یادو

وزیر اعظم نریندر مودی نے ممبئی میں پہلا لتا دینا ناتھ منگیشکر ایوارڈ حاصل کیا۔

سماج وادی پارٹی کے سربراہ اکھلیش یادو نے امیٹھی میں خودکشی کرنے والی خاتون انسپکٹر کے اہل خانہ سے آج لکھنؤ کے گوسائیں گنج میں ملاقات کی۔ اس دوران اکھلیش نے کہا ’’پولیس کو حکومت کے لیے الیکشن جیتنے کی ذمہ داری دی گئی تھی۔ میری معلومات کے مطابق پولیس تھانوں میں سیاسی دباؤ تھا۔ یہ حکومت ہر حربہ اختیار کر کے جمہوریت کا قتل کر رہی ہے۔ سماجوادیی پارٹی آئندہ اسمبلی اجلاس کے دوران اس معاملے کو اٹھائے گی۔‘‘

ہائی کورٹ سے دی گئی ضمانت کو سپریم کورٹ کی طرف سے کالعدم قرار دئے جانے کے بعد لکھیم پوری کھیری تشدد کے کلیدی ملزم آشیش مشرا نے آج لکھیم پور کھیری ضلع جیل میں خود سپرردگی کر دی۔

مہاراشٹر میں گرفتار شدہ امراوتی سے رکن پارلیمنٹ نونیت رانا اور ان کے رکن اسمبلی شوہر روی رانا کو باندرا مجسٹریٹ عدالت کی طرف سے 14 روزہ عدالتی تحویل میں بھی دیا گیا ہے۔ ان کی درخواست ضمانت پر 29 اپریل کو سماعت ہوگی، جبکہ ممبئی پولیس کو 27 اپریل تک ضمانت کے حوالہ سے رپورٹ پیش کرنے کی ہدایت دی گئی ہے۔

حیدرآباد: آندھراپردیش کے دو اضلاع میں پیش آئے سڑک حادثات میں ایک شخص ہلاک اور دس افراد شدید زخمی ہوگئے۔ ان میں 6 افراد کی حالت تشویشناک بتائی جاتی ہے۔ ایلورو ضلع کے تلاراپلی کے قریب ٹریکٹر چلانے والے نے اس کا توازن کھودیا جس کے نتیجہ میں یہ ٹریکٹر الٹ گیا اور 5 افراد زخمی ہوگئے۔ یہ افراد مندر میں درشن کے لئے جا رہے تھے کہ یہ حادثہ پیش آیا۔ ان تمام کو علاج کے لئے اسپتال منتقل کر دیا گیا۔ ضلع باپٹلہ میں دوسرا حادثہ پیش آیا۔ ضلع کے جوناتھ پلی کے قریب راہگیروں کو نامعلوم گاڑی نے ٹکر دے دی، جس کے نتیجہ میں کئی افراد زخمی ہوگئے۔ ان تمام کو علاج کے لئے گنٹور کے جی جی ایچ اسپتال منتقل کر دیا گیا جہاں علاج کے دوران ایک کی موت ہوگئی۔

انقرہ: ترکی نے شام جانے والے روسی فوجی اور سویلین طیاروں کے لیے اپنی فضائی حدود بند کر دی ہے۔ یہ اطلاع دیتے ہوئے وزیر خارجہ میولوت کاووسوگلو نے کہا کہ روس کے لیے پرواز کی اجازت اپریل میں ختم ہو گئی تھی۔ کاوو سوگلو کے حوالے سے صباح اخبار نے کہا کہ ’’ہم نے روسی فوجی طیاروں اور یہاں تک کہ شام کی طرف پرواز کرنے والے سویلین طیاروں کے لیے فضائی حدود بند کر دی ہیں‘‘۔ انہوں نے کہا کہ ’’ہم نے تین ماہ کی اجازت دی تھی۔ ان کے پاس اپریل تک اجازت تھی۔ ہمارے صدر نے (روسی صدر ولادیمیر پوتن کو اس کے بارے میں بتایا۔ اس کے بعد پروازیں بند ہو گئیں۔ اس لیے مونٹریکس کنونشن اور دیگر امور پر بات چیت کے ذریعہ ردعمل جاری ہے‘‘۔

سونی پت، 23 اپریل (یو این آئی) ڈپٹی کمشنر للت سیواچ نے بتایا کہ ہریانہ حکومت نے گزشتہ چند دنوں میں خاص طور پر نئی دہلی سے ملحقہ اضلاع میں کووڈ پازیٹیو کیسز میں اضافے کے پیش نظر سخت کووڈ ضوابط کو دوبارہ نافذ کرنے کا فیصلہ کیاہے۔
انہوں نے کہا کہ ریاستی حکومت کے وبائی امراض ایکٹ 1897 کے التزامات کےتحت دیئے گئے اختیارات کااستعمال کرتے ہوئے حکم دیاہے کہ سونی پت میں عوامی / کام کی جگہوں پر فیس ماسک/ کور پہننا لازمی ہے۔
انہوں نے کہا کہ اگر کوئی اس کی خلاف ورزی کرتا پایا گیا تو اس پر 500 روپے جرمانہ عائد کیا جائے گا۔ جرمانے کی عدم ادائیگی پر آئی پی سی کی دفعہ 188 کے تحت کارروائی کی جائے گی۔