بی جے پی ایم پی منوج تیواری کے گھر میں لاکھوں روپئے کی چوری، سابق ملازم گرفتار

دہلی کے شمال مشرقی لوک سبھا حلقہ سے بی جے پی کے رکن پارلیمنٹ اور معروف گلوکار منوج تیواری کی ممبئی واقع رہائش گاہ سے لاکھوں روپے کی چوری کا سنسنی خیز معاملہ سامنے آیا ہے۔ یہ واردات اندھیری ویسٹ کے شاستری نگر علاقے میں واقع سندربن اپارٹمنٹ میں ہوئی ہے جہاں ان کے سابق ملازم پر ہی چوری کاالزام لگایا گیا ہے۔

اس معاملے میں منوج تیواری کے منیجر پرمود جوگیندر پانڈے نے امبولی پولیس اسٹیشن میں شکایت درج کرائی ہے۔ پولیس نے مقدمہ درج کر کے فوری کارروائی کرتے ہوئے ملزم کو گرفتار کرلیا ہے۔ ابتدائی اطلاعات کے مطابق ملزم کی شناخت سریندر کمار دینا ناتھ شرما کے طور پر ہوئی ہے جسے تقریباً 2 سال قبل نوکری سے برطرف کردیا گیا تھا۔

امبولی پولیس سے موصولہ اطلاع کے مطابق شکایت کنندہ پرمود پانڈے گزشتہ 20 سالوں سے منوج تیواری کے منیجر کے طور پر کام کر رہے ہیں۔ انہوں نے پولیس کو بتایا کہ گھر کے بیڈ روم میں رکھے 5.40 لاکھ کی نقدی چوری ہوگئی تھی۔ اس میں سے جون 2025 میں کپاٹ میں رکھے 4.40 لاکھ روپے پہلے ہی غائب ہو چکے تھے لیکن اس وقت چوری کرنے والے کی شناخت نہیں ہو سکی تھی۔

چوری کی وارداتوں کا پردہ فاش کرنے کے لیے دسمبر 2025 میں گھر کے اندر سی سی ٹی وی کیمرے نصب کیے گئے تھے۔ اسی سلسلے میں 15 جنوری 2026 کی رات تقریباً 9 بجے سی سی ٹی وی الرٹ کے ذریعہ سابق ملازم سریندر کمار شرما کو چوری کرتے ہوئے دیکھا گیا۔ سی سی ٹی وی فوٹیج سے یہ بات سامنے آئی کہ ملزم کے پاس گھر، بیڈ روم اور الماریوں کی ڈپلی کیٹ چابیاں تھیں جن کی مدد سے وہ آسانی میں گھر داخل ہوتا تھا۔

پولیس کے مطابق ملزم نے اسی رات تقریباً ایک لاکھ روپے کی چوری کی تھی۔ سی سی ٹی وی فوٹیج کی بنیاد پر ملزم سے پوچھ گچھ کی گئی تو اس نے اپنے جرم کا اعتراف کر لیا۔ اس کے بعد امبولی پولیس نے اسے گرفتار کر لیا۔ پولیس نے واقعے سے متعلق سی سی ٹی وی فوٹیج قبضے میں لے کر ملزم کے خلاف متعلقہ دفعات کے تحت مقدمہ درج کرکے مزید تفتیش شروع کردی ہے۔